„ფრირაიდის" საერთაშორისო საორგანიზაციო ჯგუფის ხელმძღვანელი: მადლობა სვანეთს მასპინძლობისთვის - „ფრირაიდის" დღევანდელი შეჯიბრი უმაღლეს დონეზე ჩატარდა

8-02-2022

სვანეთში, კურორტ თეთნულდზე „ფრირაიდის" მსოფლიო ტურის საკვალიფიკაციო (FWQ) ეტაპის პირველი, 2-ვარსკვლავიანი შეჯიბრი დასრულდა. ფრირაიდის საერთაშორისო  საორგანიზაციო ჯგუფის ხელმძღვანელის ხავიერ ტრობას განცხადებით, კურორტი თეთნულდი ნამდვილად შესანიშნავი ლოკაცია გამოდგა ფრირაიდის შეჯიბრის ჩატარებისთვის. ღონისძიება ეკონომიკისა და მდგრადი განვითარების სამინისტროს „მთის კურორტების განვითარების კომპანიის" ორგანიზებითა  და USAID-ის ეკონომიკური უსაფრთხოების პროგრამის, მესტიის მუნიციპალიტეტის მერიის, სვანეთის დანიშნულების ადგილის მართვის ორგანიზაცია შან-ლენდისა და ტურიზმის ეროვნული ადმინისტრაციის მხარდაჭერით ჩატარდა.

„დღეს ჩვენმა სპორტსმენებმა სასიამოვნო სანახაობა გამართეს კურორტ თეთნულდზე, სადაც კარგმა თოვლმაც შეგვიწყო ხელი. ძალიან კმაყოფილები ვართ დღევანდელი შეჯიბრის მიმდინარეობით და მინდა მადლობა ვუთრა თეთნულდს, სვანეთს ფრირაიდის შეჯიბრის ასეთი შესანიშნავი მასპინძლობისთვის,  ასევე მაშველთა გუნდს და თითოეულ იმ ადამიანს, მათ შორის მონაწილეებს, ვისი ჩართულობითაც დღევანდელი შეჯიბრი უმაღლეს დონეზე გაიმართა", - განაცხადა „ფრირაიდის" საერთაშორისო საორგანიზაციო ჯგუფის ხელმძღვანელმა ხავიერ ტრობამ. 

თეთნულდზე „ფრირაიდის" (Freeride) კვირეულის ფარგლებში,  ფრირაიდის მსოფლიო ტურის საკვალიფიკაციო (FWQ) ეტაპები საქართველოში წელს პირველად ტარდება. საკვალიფიკაციო ეტაპები მოიცავს მცირე- 2 ვარსკვლავიან და დიდ - 4 ვარსკვლავიან შეჯიბრებებს. მცირე შეჯიბრი უზრუნველყოფს ადგილობრივი და დამწყები სპორტსმენების ჩართულობას, ხოლო დიდი შეჯიბრი მაღალი რეიტინგის უცხოელი სპორტსმენების მონაწილეობასა და საერთაშორისო გაშუქებას. შეჯიბრებებში, 20 ქვეყნის (შვეიცარია შვედეთი ავსტრია ,საფრანგეთი , ახალი ზელანდია, გერმანია დიდი ბრიტანეთი და ა.შ) 120-მდე სპორტსმენი  ასპარეზობს. 

საქართველოს „მთის კურორტების განვითარების კომპანიის" დირექტორის ირაკლი ჭირაქაძის თქმით, დღევანდელი 2-ვარსკვლავიანი შეჯიბრი წარმატებით დასრულდა და საორგანიზაციო გუნდი დარწმუნებულია, რომ მეორე - 4-ვარსკვლავიანი შეჯიბრიც ასეთივე წარმატებული გამოვა. 

„მოხარულები ვართ, რომ „ფრირაიდის" საერთაშორისო საორგანიზაციო ჯგუფის მხრიდან  დადებითი შეფასებები მივიღეთ, განსაკუთრებით საორგანიზაციო საკითხების იდეალურად შესრულებისთვის. წინ კიდევ ერთი შეჯიბრი გველის და დარწმუნებული ვარ, მასაც ღირსეულად გავართმევთ თავს", - აღნიშნა ირაკლი ჭირაქაძემ. მისი თქმით, ღონისძიების მაღალი სტანდარტით ჩატარება წარმოაჩენს საქართველოს სამთო-სათხილამურო კურორტების პოტენციალს საერთაშორისო მასშტაბით, გაზრდის საქართველოს სამთო-სათხილამურო კურორტების ცნობადობას და უფრო მიმზიდველს გახდის  ადგილობრივი და უცხოელი დამსვენებლებისა და ინვესტორებისთვის, რაც, თავის მხრივ, ხელს შეუწყობს საქართველოში ტურიზმის განვითარებასა და შესაბამისი საინვესტიციო გარემოს შექმნას.

აღსანიშნავია, რომ ფრირაიდის სპორტის სახეობებში არსებობს ღონისძიებების იერარქია, რომლის მიხედვით ხდება წლიური კალენდრის დაგეგმვა. საქართველოს მიეცა უნიკალური შესაძლებლობა, პირველივე წელს უმასპინძლოს მსოფლიო ფრირაიდის შესარჩევ (Freeride World Qualifier) ყველაზე მაღალი კატეგორიის საკვალიფიკაციო ეტაპს, რომელიც 4 ვარსკვლავით ფასდება. აღნიშნულ შეჯიბრზე უფრო მაღალი დონე მხოლოდ ფრირაიდის მსოფლიო ტურია (Freeride World Tour), რომლის მასპინძლობის შესაძლებლობა საქართველოს მიეცემა საკვალიფიკაციო ეტაპების წარმატებით ჩატარების შედეგად.