„ჩვენ მივიღეთ სტრატეგიული გადაწყვეტილება. სოფლის სკოლები უნდა გახდეს კულტურულ-საგანმანათლებლო ცენტრები.
გაკვეთილების დასრულების შემდეგ სკოლები იქნება ღია მთელი სოფლის მოსახლეობისთვის, სადაც მათ შეეძლებათ გააგრძელონ განათლება თუ ამის სურვილი გააჩნიათ. ისწავლონ, გაიღრმავონ ცოდნა. აქ იქნება მრავალი კულტურული ღონისძიება.
ეს სერიოზულ შედეგს მოგვიტანს. მთელი სოფლის მოსახლეობა ჩართული იქნება იმ სოფელში მდებარე სკოლის ცხოვრებაში. ამ გზით მიიღწევა მთელი სიცოცხლის განმავლობაში განათლების მიღების უწყვეტობა“, - განაცხადა მიხეილ ჩხენკელმა.
მისივე თქმით, იგეგმება Microsoft-ის საგანმანათლებლო პროექტ Minecraft Education Edition-ის სკოლებში დანერგვა. თამაშზე დაფუძნებულ საგანმანათლებლო პროგრამას პედაგოგები გარკვეული საგნების სწავლების დროს გამოიყენებენ, რაც მოსწავლეებში სივრცითი, ლოგიკური და შემოქმედებითი უნარების განვითარებას შეუწყობს ხელს.
სამოქმედო გეგმა ითვალისწინებს არაფორმალური განათლების ხელშეწყობასაც. კერძოდ, მიხეილ ჩხენკელის თქმით, სამინისტრო ხელს შეუწყობს სეზონური სამეცნიერო სკოლების ფუნქციონირებას. გაიზრდება ხელმისაწვდომობა ახალგაზრდულ და მოსწავლეთა ბანაკებზე. ბანაკების ინტერნაციონალიზაცია ხელს შეუწყობს ახალგაზრდების უცხოელ თანატოლებთან დამეგობრებას და ახალგაზრდული დიპლომატიის განვითარებას.
განათლების მინისტრის თქმით, სამოქმედო გეგმა განათლების ყველა დონეზე - ზოგად, პროფესიულ და უმაღლეს განათლებაში ხარისხის ამაღლებას ემსახურება, რაც მთავრობის ოთხპუნქტიანი გეგმის ერთ-ერთი ნაწილია და გარკვეული კომპონენტების განხორციელება უკვე დაწყებულია.
