სამართლიანად ჩატარდა თუ არა არჩევნები
სენაკში კლიმატის ცვლილებით გამოწვეული კატასტროფების რისკის შემცირების ღონისძიებები დაიწყო
19-05-2022
შვედეთის საელჩოს და გაეროს განვითარების პროგრამის (UNDP) წარმომადგენლები პროექტის – “კლიმატის ცვლილებით გამოწვეული კატასტროფების რისკის შემცირება საქართველოში” ფარგლებში სენაკის მუნიციპალიტეტს ეწვივნენ, წყალდიდობისგან დამცავი ინფრასტრუქტურული სამუშაოები დაათვალიერეს და სკოლის მოსწავლეების ტრენინგს დაესწრნენ, – ამის შესახებ ინფორმაციას სსიპ გარემოსდაცვითი ინფორმაციისა და განათლების ცენტრი ავრცელებს.
მათივე ცნობით, შვედეთის ელჩის მოადგილემ და შვედეთის საელჩოს განვითარებისა და თანამშრომლობის განყოფილების ხელმძღვანელმა ერიკ ილესმა, შვედეთის საელჩოს პროგრამების ხელმძღვანელმა ხათუნა ზალდასტანიშვილმა და UNDP-ის გარემოს დაცვისა და ენერგეტიკის მიმართულების ხელმძღვანელმა ნინო ანთაძემ დაათვალიერეს მდინარე ცივის კალაპოტის 2,180-მეტრიან მონაკვეთზე მიმდინარე სამუშაოები და დამცავი ნაგებობის მშენებლობა.
ინფრასრუქტურული სამუშაოების მონახულების შემდეგ, სენაკის მუნიციპალიტეტის მერიაში გაიმართა შეხვედრა, სადაც გარემოსდაცვითი ინფორმაციისა და განათლების ცენტრის ადგილობრივმა კოორდინატორმა პროექტის ფარგლებში განხორციელებული და დაგეგმილი ცნობიერების ასამაღლებელ აქტივობებზე ისაუბრა. ასევე, სენაკის მუნიციპალიტეტში არსებულ მდგომარეობაზე ინფორმაცია წარადგინა გარემოსდაცვითი ეკოლოგიური ასოციაცია „დეას“-ს წარმომადგენელმა.
შეხვედრის შემდეგ წმინდა ალექსი შუშანიას სახელობის მართლმადიდებლურ სკოლა გიმნაზიაში VIII-IX კლასელებისთვის კლიმატის ცვლილების და კატასტროფების რისკის შემცირების შესახებ ტრენინგი ჩატარდა, რომლის მიზანიც მოსწავლეების გარემოსდაცვითი ცნობიერების ამაღლებაა.
