ვლადიმერ იმნაძემ თურქეთის ელჩს ფატმა სერენ იაზგანს და TIKA-ს თბილისის ოფისის კოორდინატორს ჰუსეინ შანლის უმასპინძლა

31-05-2018

ვეტერანების საქმეთა სახელმწიფო სამსახურში, თურქეთ-საქართველოს ურთიერთანამშრომლობის ფარგლებში, თურქეთის ელჩთან, ფატმა სერენ იაზგანთან და თურქეთის თანამშრომლობისა და განვითარების სააგენტოს, TIKA-ს თბილისის ოფისის კოორდინატორთან, ჰუსეინ შანლისთან, შეხვედრა გაიმართა. თურქეთის თანამშრომლობისა და განვითარების სააგენტომ, TIKA -მ, ვეტერანების საქმეთა სახელმწიფო სამსახურის ახალი შენობის საკონფერენციო დარბაზი, ტექნიკურად, უსასყიდლოდ აღჭურვა, რომელიც დღეს ვეტერანების საქმეთა სახელმწიფო სამსახურის დირექტორმა, ვლადიმერ იმნაძემ და თურქეთის ელჩმა, ფატმა სერენ იაზგანმა საზეიმო ვითარებაში გახსნეს.

შეხვედრას, ასევე, დაესწრო პარლამენტის თავდაცვისა და უშიშროების თავმჯდომარის მოადგილე, გენერალ-მაიორი, კობა კობალაძე. "მოგესალმებით თქვენო აღმატებულებავ! დღეს ჩვენ ნამდვილად საზეიმო დღე გვაქვს, თურქეთის რესპუბლიკის დახმარებით, ჩვენ შევძელით, ასეთი მშვენიერი საკონფერენციო დარბაზის გახსნა. თურქეთთან ჩემი განსაკუთრებული დამოკიდებულება მაშინ დაიწყო, როცა 2004 წელს, თურქმა ექიმებმა ანკარაში, მეორე სიცოცხლე მაჩუქეს. თურქეთთან ჩვენ სხვადასხვა სფეროში გვაქვს მეგობრული ურთიერთობა. გვეგმავთ დელეგაციის გაგზავნას, ჩემი ხელმძღვანელობით, თურქეთის რესპუბლიკაში, რათა გავეცნოთ მათ გამოცდილებას ვეტერანებთან მიმართებაში. მინდა, განსაკუთრებული მადლობა გადავუხადო სააგენტო TIKA-ს თანადგომისა და დახმარებისთვის." - აღნიშნა ვლადიმერ იმნაძემ სიტყვით გამოსვლისას.

" თქვენ ხართ წარმომადგენელი ჩვენი ქვეყნის ერთ-ერთი დიდი მეგობრის და ძლიერი სახელმწიფოსი - თურქეთის რესპუბლიკის. ჩვენთვის დიდი პატივია თქვენი სტუმრობა, თქვენთან მეგობრობა. ჩვენ გვაქვს ბევრი საერთო და შორსმხედველი მიზნები. მინდა, მოგახსენოთ, რომ სახელმწიფომ ჩვენ, ვეტერანებს გადმოგვცა ტერიტორია, რომელზეც მიზნობრივად არის განსაზღვრული ვეტერანებისთვის სამხედრო ჰოსპიტალის აშენება. ჩვენ ვიცით, რომ თურქეთი ერთ-ერთი წამყვანი ქვეყანაა მედიცინაში, სამედიცინო ინფრასტრუქტურის ჩამოყალიბების დარგში და ამ მიმართულებითაც, იმედი გვაქვს თქვენი თანადგომის."- მიმართა კობა კობალაძემ ფატმა სერენ იაზგანს მისასალმებელ სიტყვაში.

" ძალიან დიდი მადლობა, ჩემთვის დიდი პატივია, რომ ვიმყოფებოდი აქ თქვენთან ერთად. ვეტერანების და ომში დაღუპულების თემა, ერთ-ერთი უმთავრესია ჩვენთვის თურქეთში, ისევე როგორც საქართველოში. სისხლი, რომელიც დაიღვარა სამშობლოსთვის იმდენადვე მნიშვნელოვანია, რამდენადაც შვილების დამოუკიდებლობა. საქართველოს შვილები ჩვენი შვილები არიან. დიდი მადლობა TIKA-ს თანამშრომლობისთვის, ამ მშვენიერი დასაწყისისათვის, რომელიც განხორციელდა ასეთი მშვენიერი საკონფერენციო დარბაზის აღჭურვით. ურთიერთობა საქართველოსა და თურქეთს შორის, ყველა სფეროში მართლაც საოცარი ტემპით ვითარდება. თავდაცვის მიმართულება არის ერთ-ერთი ყველაზე სწრაფად განვითარებადი. საქართველოს დემოკრატიული რესპუბლიკის 100 წლისთავისთვის ჩვენი თავდაცვის მინისტრი აქ იმყოფებოდა. ერთხელ ვინც იყო სამხედრო, ის ყოველთვის სამხედრო იქნება. ვეტერანი არ არის თადარიგის სამხედრო პირი. როდესაც თავდაცვის მიმართულებით თანამშრომლობის განვითარებაზეა საუბარი, ის მდიდარი გამოცდილება, რომელიც აქვთ ვეტერანებს, აუცილებლად უდნა იყოს გათვალისწინებული და გადაცემული შემდგომი თაობებისთვის. ის ყველაფერი რაც ვეტერანებმა გაიღეს ქვეყნისათვის მათ უნდა დაუბრუნდეთ თუნდაც ეკონომიკური კუთხით. ყველა იმ პროექტში, რომელიც ითვალისწინებს სამშობლოს სიყვარული გაღვივებას ახალგაზრდა თაობაში, ჩვენ ყოველთვის თქვენს გვერდით ვიქნებით. დიდი მადლობა მასპინძლობისთვის! თუ რაიმე იქნება საჭირო ყოველთვის გქონდეთ ჩვენი იმედი."- განაცხადა ფატმა სერენ იაზგანმა.

" მეც დიდი მადლობა მინდა გითხრათ თურქეთის თანამშრომლობისა და განვითარების სააგენტოს, TIKA-ს სახელით ბატონ ვლადიმერს, ბატონ კობას და ყველა აქ დამსწრე საზოგადოებას. თურქეთის თანამშრომლობისა და განვითარების სააგენტოს, TIKA უკვე 24 წელია მოღვაწეობს საქართველოში. საქმიანობის სფერო მრავალმხრივია, განათლება ჯანდაცვა სოფლის მეურნეობა და.ა.შ ის პროექტი, რომლის გამოც აქ ვიმოყოფებით, სოციალური მიმართულებისაა და ვფიქრობთ, ამ მიმართულებით ჩვენ წვლილი შევიტანეთ საზოგადოების განვითარებაში. ჩვენი ორგანიზაცია მზად იქნება მომავალშიც ითანამშრომლოს საქართველოს სახელმწიფო სტრუქტურებთან. ჩემთვის დიდი პატივია ჩემი ორგანიზაციის სახელით ვიმყოფებოდი დღეს აქ გახსნაზე. ვიცით, რომ საქართველოს ვეტერანების სახელმწიფო სამსახური პატრონაჟს ახორციელებს 70 ათასამდე ვეტერანზე, ღმერთმა ქნას, რომ ეს რიცხვი არ გაიზარდოს, მაგრამ ჩვენ ჩვენი ორგანიზაციის სახელით, ქალბატონი ელჩის სახელით სოციალური და იურიდიული გარანტიებით, რომელიც ამ მიზნობრივი ჯგუფისთვის გაქვთ დაგეგმილი, ვეცდებით მუდამ თქვენს გვერდით ვიყოთ. კიდევ ერთხელ გილოცავთ და წარმატებას გისურვებთ თქვენ საქმიანობაში."- განცხადა ჰუსეინ შანლიმ.