სამართლიანად ჩატარდა თუ არა არჩევნები
ნანა კაკაბაძე: მიდის გაშმაგებული ბრძოლა, სადაც ყველა მიუღებელი მეთოდი და იარაღი აქტიურად გამოიყენება, ეს ყოველივე გასაკვირი არ არის, ვინაიდან "ლიბერალები" ბოლო შანსს გრძნობენ
29-07-2022
„ისეთი შთაბეჭდილება იქმნება, რომ მოქმედებს ლოზუნგი - „ფსევდო ლიბერალებო ყველა ქვეყნისა, თბილისში შეერთდით"... ყველა მათგანს აერთიანებს ერთი მთავარი მიზანი - „ბიძინა ივანიშვილის განეიტრალება!“ კაცი თითქმის 2 წელია წასულია პოლიტიკიდან, ვერ მოიძებნა თუნდაც ერთი ყოფილი თუ მოქმედი თანამდებობის პირი, რომელიც ამბობს ივანიშვილი მითითებებს მაძლევდაო, მაგრამ მაინც უარგუმენტოდ ისევ თავისას გაიძახიან, სანამ ოცნება ხელისუფლებაშია, შენ წასულად არ ჩაითვლებიო, ანუ ჩაგვაბარეთ ხელისუფლება და გააუქმეთ პარტია“- ამის შესახებ არასამთავრობო ორგანიზაცია „ყოფილი პოლიტპატიმრები ადამიანის უფლებებისთვის“ თავმჯდომარე ნანა კაკაბაძე Facebook-ზე წერს.
მისივე თქმით ამიტომაც მიდის გაშმაგებული ბრძოლა, სადაც ყველა მიუღებელი მეთოდი და იარაღი აქტიურად გამოიყენება - სიცრუე, მოსყიდვა, ღალატი, ორპირობა, თვალებში ნაცრის შეყრა და საზოგადოების მოტყუება.
„ფსევდო ლიბერალების ბოლო შანსი კაცობრიობის ისტორია ომების ისტორიაა, იგი ეფუძნება იდეოლოგიურ და მსოფლმხედველობრივ უთანხმოებებს. წინა საუკუნეებში ეს უთანხმოებები ტერიტორიების დაპყრობაში და რელიგიურ დაპირისპირებებში ვლინდებოდა. მე-20 საუკუნეში ბრძოლა კომუნისტურ-ფაშისტურსა და დემოკრატიულ იდეოლოგიებს შორის მოხდა. 21-ე საუკუნის დაპირისპირება, ფსევდო ლიბერალიზმსა და კონსერვატიზმს შორის მიმდინარეობს. ეს ბრძოლა საკმაოდ დაუნდობელი აღმოჩნდა ვინაიდან ფსევდო ლიბერალიზმი, არსით ტოტალიტარულია და არანაკლებ დაუნდობელი, ვიდრე რელიგიური ომები. დღეს ეს ომები ხშირად ქვეყნების შიგნით, გახლეჩილი საზოგადოების ნაწილებს შორის იწარმოება. ამ ომს ვერც ჩვენმა ქვეყანამ აუარა გვერდი.
საქართველოში ბრძოლა გაჩაღებულია, ფსევდო ლიბერალებსა და კონსერვატორებს შორის, ლოზუნგით - „ძირს რუსეთუმე ოლიგარქი ბიძინა ივანიშვილი!“ ამ ლოზუნგის გარშემო ერთიანდებიან ხელისუფლების ჟინით აღტყინებული პარტიები, NGO-ები, მაფიოზები და ლუმპენ პროლეტარების დიდი ნაწილი, რომლებსაც აქტიურად ეხმარებიან ემიგრანტების, უცხოეთში მცხოვრები ქართული გვარის მქონე ცნობადი სახეების, ევროპარლამენტარების, LGBT აქტივისტებისა და დიპლომატების "ლიბერალური" ნაწილი. კომუნისტების დროს არსებობდა სახალისო გამოთქმა: „მარქსმა კი თქვა, „პროლეტარებო ყველა ქვეყნისა, შეერთდითო“, მაგრამ ის არ უთქვამს, თბილისში შეერთდითო“. მოკლედ, დღეს ისეთი შთაბეჭდილება იქმნება, რომ მოქმედებს ლოზუნგი - „ფსევდო ლიბერალებო ყველა ქვეყნისა, თბილისში შეერთდით"... ყველა მათგანს აერთიანებს ერთი მთავარი მიზანი - „ბიძინა ივანიშვილის განეიტრალება!“. ბიძინას ყოველ სიტყვას, წელიწადში ერთხელ ან უფრო იშვიათად გაჟღერებულს, საპირისპიროდ ინტერპრეტირებენ და ცდილობენ საზოგადოებას მრუდე სარკეში დაანახონ: სიკეთეს ბოროტება დაარქვან, ქველმოქმედებას - ანგარება, კეთილგონიერებას - რუსეთუმეობა, პატრიოტიზმს - მოღალატეობა და ა. შ. მაგალითად, თუ ბიძინა ივანიშვილი ამბობს, რომ საქართველო ომში არ უნდა ჩაებას, ვინაიდან ეს ჩვენთვის დამღუპველია, ასევე თუ გააჟღერებს აშშ-ს ელჩის 3 საათიანი ვიზიტის შესახებ, მაშინვე მატყუარა "ლიბერალები" დასჭყივლებენ - „აი, ხომ ვამბობდით, ეგ მართავს ქვეყანას და მაგის პოზიციას ახმოვანებს ხელისუფლება. თუ ეს ასე არ არის, აბა, ელჩი რატომ მიდის მასთან სასაუბროდ?“ თუ ბიძინა იტყვის, ჩემი ფინანსური დავა ჩემი პირადი საქმეა, ამაზე ნუ მოცდებით, ეცადეთ დაალაგოთ ურთიერთობები ჩვენს სტრატეგიულ პარტნიორებთანო, ამ სიტყვებს შემდეგნაირად თარგმნიან - „საკუთარი უსაფრთხოება და ქონება ყველაზე მეტად აწუხებს, დასავლეთს ევაჭრება და ფსონად ქვეყანა ჩადო, ანუ საქართველოს ყიდისო“.
მოკლედ, დეოლიგარქიზაცია დებიძინიზაციას ნიშნავს და ამიტომ ბიძინა უნდა წავიდესო. კაცი თითქმის 2 წელია წასულია პოლიტიკიდან, ვერ მოიძებნა თუნდაც ერთი ყოფილი თუ მოქმედი თანამდებობის პირი, რომელიც ამბობს ივანიშვილი მითითებებს მაძლევდაო, მაგრამ მაინც უარგუმენტოდ ისევ თავისას გაიძახიან, სანამ ოცნება ხელისუფლებაშია, შენ წასულად არ ჩაითვლებიო. ანუ ჩაგვაბარეთ ხელისუფლება და გააუქმეთ პარტია.
საქართველოში ერთი შენობაც არ ააშენო, ერთი კაციც არ დააფინანსო, ერთი ცენტიც არ დახარჯო, თორემ ამასაც პოლიტიკურ მოღვაწეობად ჩაგითვლით და მაინც ჩვენი, ანუ "ლიბერალების" დარტყმის ობიექტი იქნებიო და გიენებივით შემოსეულები ვიქნებით მანამ, სანამ ჩვენსას არ მივაღწევთო. მოკლედ, გაქრი, თორემ ჩვენ გაგაქრობთო, ჯერ მორალურად და პოლიტიკურად, შემდეგ კი ფიზიკურადაცო. რაც მთავარია, ამის მოსწრება სასწრაფოდ უნდათ, 2024 წლამდე ვერ იცდიან, რადგან ეშინიათ, ვაითუ მაგ წელს აშშ-ს არჩევნებში ისევ კონსერვატორმა ტრამპმა გაიმარჯვოს, რომელმაც უკვე ფაქტიურად დაიწყო წინასაარჩევნო კამპანია და ეს რომ ასე მოხდეს, ფსევდო ლიბერალურ ძალებს საქართველოში ხომ საბოლოოდ მოესპობათ ძალაუფლების ხელში ჩაგდების პერსპექტივაო? ამიტომაც მიდის გაშმაგებული ბრძოლა, სადაც ყველა მიუღებელი მეთოდი და იარაღი აქტიურად გამოიყენება - სიცრუე, მოსყიდვა, ღალატი, ორპირობა, თვალებში ნაცრის შეყრა, საზოგადოების მოტყუება, შანტაჟი, მუქარა, შეთქმულება, ლანძღვა, გინება, ტვინების გამორეცხვა, პროვოკაცია და ათასი სხვა სიბინძურე. ეს ყოველივე გასაკვირი არ არის, ვინაიდან "ლიბერალები" გრძნობენ, ბოლო შანსს. ევროკავშირის 12 ბუნდოვანი რეკომენდაციაც მაშველ რგოლად არის გადმოგდებული და თუ ესეც ვერ გამოვიყენეთ ხელისუფლების დასამხობად, მაშინ ხომ ყველანაირი პერსპექტივა დაკარგული იქნებაო. ალბათ ეს ასეც არის. ამიტომაც, ვინც ამას ხედავს და ვისაც ფსევდო ლიბერალების გამარჯვება საქართველოს დაღუპვად მიაჩნია, ყველას გვმართებს მეტი კონსოლიდაცია, მეტი აქტიურობა, მეტი მოთმინება და მეტი სიმტკიცე, რადგან ყველა პროვოკაციაზე წამსვლელ ნეოფაშისტ-ლიბერალებისგან ყველაფერია მოსალოდნელი“- წერს ნანა კაკაბაძე.
