სამართლიანად ჩატარდა თუ არა არჩევნები
კახელი ფერმერები ხორბლის დაბალ ფასს აპროტესტებენ
12-06-2018
სიღნაღის მუნიციპალიტეტის ფერმერთა და სოფლის მეურნეობის მუშაკთა კავშირის ხელმძღვანელის, ირინა ფხოველიშვილის თქმით, მეხორბლები ხელისუფლებას დახმარებას სთხოვენ და შესაბამისი წერილით მთავრობის ადმინისტრაციას მიმართავენ.
მისი თქმით, ფერმერები 1 კგ ხორბლის დაბალ ფასს აპროტესტებენ.
,,იმის ფონზე, რომ საწვავისა და მექანიზაციის ხარჯები გაიზრდა, ფერმერებს ხორბლის წარმოება ძვირი უჯდებათ, ფასი კი ხორბალზე ყოველწლიურად მცირდება. ამ ეტაპზე კი 1 კგ ხორბლის ფასი 37-38 თეთრს უტოლდება. სახელმწიფომ უნდა განახორციელოს ისეთი ღონისძიებები, როგორებიცაა ხორბლის პრიორიტეტად აღიარება და სახელმწიფო პროგრამების განხორციელება მეხორბლეების მიმართულებით. ჩვენ ეს ყველაფერი ჩამოვუწერეთ მთავრობას და ვფიქრობთ, რომ უნდა დაიწყოს გარკვეული ნაბიჯების გადადგმა. წინააღმდეგ შემთხვევაში შექმნილი მძიმე მდგომარეობიდან გამომდინარე ქვეყანაში ხორბლის რაოდენობა კიდევ უფრო შემცირდება, უფრო მეტიც - ბევრი ფერმერი ხორბლის წარმოებაზე უარსაც კი იტყვის", - აცხადებს ირინა ფხოველიშვილი.
ფერმერების ინფორმაციით, უცხოურ ხორბალზე ფასი ბევრად უფრო მაღალია და ის 1 კილოგრამზე 65 თეთრს უტოლდება. მათი განცხადებით, ფერმერების მთავარი მოთხოვნა 1 კგ ხორბლის ღირებულების 50 თეთრამდე გაზრდაა.
