სამართლიანად ჩატარდა თუ არა არჩევნები
მიხეილ ჩხენკელმა შეფასებისა და გამოცდების ეროვნული ცენტრის 20 წლის იუბილესადმი მიძღვნილი კონფერენცია გახსნა
22-11-2022
საქართველოს განათლებისა და მეცნიერების მინისტრმა მიხეილ ჩხენკელმა შეფასებისა და გამოცდების ეროვნული ცენტრის 20 წლის იუბილესადმი მიძღვნილი კონფერენცია გახსნა.
მიხეილ ჩხენკელმა დამსწრე საზოგადოებას სიტყვით მიმართა, ცენტრის თანამშრომლებს 20 წლის იუბილე მიულოცა და მრავალწლიანი თავდაუზოგავი შრომისთვის მათ განსაკუთრებული მადლობა გადაუხადა.
მინისტრმა პანდემიის პერიოდში შეფასებისა და გამოცდების ეროვნული ცენტრის საქმიანობის მნიშვნელობას გაუსვა ხაზი. მისი თქმით, როდესაც ქვეყნების უმრავლესობამ პანდემიის პირობებში უარი თქვა მსგავსი მასშტაბის გამოცდების ჩატარებაზე, ცენტრმა უმოკლეს დროში სრულიად შეცვალა გამოცდების ორგანიზების პრინციპი და თითქმის ყველა სესია ორჯერ ჩაატარა, რათა კოვიდინფიცირებულ აბიტურიენტებსაც ჰქონოდათ გამოცდაზე გასვლის შესაძლებლობა.
როგორც მინისტრმა აღნიშნა, ცენტრის თითოეული თანამშრომლის ძალისხმევის შედეგად, სხვადასხვა უწყებასთან კოორდინაციით, ქვეყანაში გამოცდები იმ პერიოდისთვის მოქმედი რეგულაციების სრული დაცვით ჩატარდა – საქართველოს განათლებისა და მეცნიერების სამინისტროსთან ერთად შეფასებისა და გამოცდების ეროვნულმა ცენტრმა ყველაფერი გააკეთა და თითოეული გამოსაცდელისთვის უზრუნველყო სრულფასოვანი და უსაფრთხო აკადემიური გარემო.
მიხეილ ჩხენკელმა საუბრისას საგამოცდო სისტემის გაუმჯობესების კუთხით გადადგმულ ნაბიჯებზე გაამახვილა ყურადღება. მისი თქმით, 2022 წელს შეფასებისა და გამოცდების ეროვნულმა ცენტრმა მნიშვნელოვანი სიახლე შესთავაზა მასწავლებლებს. პირველად ჩატარდა არაქართულენოვანი სკოლების მშობლიური ენისა და ლიტერატურის პედაგოგთათვის ორი ახალი გამოცდა – აზერბაიჯანული ენისა და ლიტერატურის და სომხური ენისა და ლიტერატურის პედაგოგთა საგნის გამოცდები. შედეგად, არაქართულენოვანი სკოლების მასწავლებლებს კვალიფიკაციის ამაღლებისა და კარიერული წინსვლის შესაძლებლობა მიეცათ.
შეფასებისა და გამოცდების ეროვნული ცენტრის 20 წლის იუბილესადმი მიძღვნილ კონფერენციას ესწრებოდნენ საქართველოს განათლებისა და მეცნიერების მინისტრის პირველი მოადგილე თამარ მახარაშვილი, სამინისტროს და მის დაქვემდებარებაში მყოფი უწყებების თანამშრომლები, ადგილობრივი და საერთაშორისო ორგანიზაციების, სკოლებისა და უმაღლესი საგანმანათლებლო დაწესებულებების წარმომადგენლები, განათლების ექსპერტები და სხვა მოწვეული სტუმრები.
