სამართლიანად ჩატარდა თუ არა არჩევნები
მამუკა მდინარაძე: ერთადერთი, ვინც ცივილიზებულ სამყაროში უკრაინის ომში მოხალისეების მონაწილეობას ახალისებს, ეს არის ქართული ოპოზიცია
6-12-2022
ერთადერთი, ვინც ცივილიზებულ სამყაროში უკრაინის ომში მოხალისეების მონაწილეობას ახალისებს, ეს არის ქართული ოპოზიცია. ევროპელი ლიდერები, ჩვენი მეგობარი შტატების ლიდერები, მიუხედავად იმისა, რომ სამხედრო დახმარებასაც კი უწევენ უკრაინას, ემიჯნებიან მოხალისეების ჩართულობას და არ იწონებენ ამ ფაქტს, საქართველოში ამას ახალისებენ ჩვენი ოპონენტები და მათი მედიასაშუალებები - ამის შესახებ „ქართული ოცნების“ აღმასრულებელმა მდივანმა მამუკა მდინარაძემ ჟურნალისტებს განუცხადა.
როგორც მამუკა მდინარაძემ აღნიშნა, საქართველოს წინააღმდეგ ჩვეულებრივი პიარ კამპანიაა დაგეგმილი.
„საბოლოო მიზანი ყველა ამ დეტალის, რომელიც მათ პიარ კამპანიაშია, არის საქართველოს დაფიქსირება, როგორც ომში მონაწილე მხარის. მათი ძირითადი მიზანია დააზიანონ საქართველო და მისი ხელისუფლება და მეორე - დღეს მათი პირველი რიგის მიზანი საქართველოს ომში ჩართვაა. ისიც, რომ ძალიან სპეკულაციურად, ბინძურად, ინსტრუმენტებად იყენებენ გარდაცვლილ ადამიანებს.
რა გამოდის ჩვენ არ გვწყინს და მათ სწყინთ, „ნაცები“ არიან ადამიანები და ნერვიულობენ ადამიანის გარდაცვალებას, ჩვენ არ ვნერვიულობთ და არ განვიცდით ამას? ამის გამოყვანა უნდათ? ადამიანის გარდაცვალების და სიკვდილის პიარული თანამზრახველები არიან. გარდაცვალების ფაქტის პიარული მიზნების გამოყენებაში არიან სიკვდილის თანამზრახველები. ეს არის რეალობა. მეგულება კონკრეტული ადამიანები ომის და ღალატის პარტიაში, რომლებსაც უხარიათ კიდეც ასეთი ფაქტები იმისთვის, რომ პიარული დარტყმები განახორციელონ“ - განაცხადა მამუკა მდინარაძემ.
მისივე თქმით, როდესაც ისინი ამ ადამიანების სტატუსზე ლაპარაკობენ, სინამდვილეში ეს ადამიანები არ აღელვებთ.
„მაგალითად, გუშინ ჯანდაცვის კომიტეტში განიხილებოდა მათი ინიციატივა უკრაინაში დაღუპული მებრძოლების სტატუსზე, რომელიც საქართველომ უნდა აღიაროს და ეს შეფუთული ჰქონდათ კომპენსაციის მოთხოვნით. როგორც კი მსგავსი პრეცედენტი დაიშვება, ესეც არის გარკვეულწილად აღიარება სამხედრო კონფლიქტში მონაწილეობის. ევროპის ქვეყნებიდან არ იღუპებიან ადამიანები? ჩვენი მეგობარი შტატებიდან არცერთი ადამიანი არ დაღუპულა? ხომ არიან ასეთივე გმირული სულისკვეთებით ადამიანები, რომლებიც იბრძვიან უკრაინაში, როგორც ქართველი კონკრეტული მეომრები. რატომ არ იმჩნევენ ევროპის და შტატების ლიდერები ამ სიტუაციებს? გახსენდებათ რაიმე მკვეთრი განცხადება? პირიქით, გაგახსენებთ შტატების და დიდი ბრიტანეთის ლიდერების განცხადებებს, რომლებმაც თქვეს, ეს ის ქვეყნებია, არ დაგავიწყდეთ, რომლებიც არ ერიდებიან უკრაინის ფინანსურ და სამხედრო დახმარებას. მათ თქვეს, რომ ჩვენ ვერ მივესალმებით მოხალისეების მონაწილეობასო.
მათი ამ განცხადებების საფუძველი რა იყო, იყო ის, რომ ერთი მხრივ, ვივარაუდოთ რომ მათ მიაჩნიათ, რომ რომანტიზება არ უნდა მოხდეს ომში ჩართვის, კონკრეტული მათი თანამოქალაქეების მხრიდან, არ უნდა მოხდეს მათი სტატუსების აღიარება რომ უფრო მეტი მოქალაქე არ ჩაერთოს და გაუფრთხილდნენ თავის მოქალაქეებს. მათი მხრიდან თუ თავის მოქალაქეებზე გაფრთხილებაა, ჩვენი მხრიდან მტრობა და ღალატია? რატომ ხდება ასეთი დიფერენცირება? ერთადერთი, ვინც ცივილიზებულ სამყაროში უკრაინის ომში მოხალისეების მონაწილეობას ახალისებს, ეს არის ქართული ოპოზიცია. კიდევ ერთხელ ვიმეორებ ხაზგასმით და მოკლედ. ევროპელი ლიდერები, ჩვენი მეგობარი შტატების ლიდერები, მიუხედავად იმისა, რომ სამხედრო დახმარებასაც კი უწევენ უკრაინას, ემიჯნებიან მოხალისეების ჩართულობას და არ იწონებენ ამ ფაქტს, საქართველოში ამას ახალისებენ ჩვენი ოპონენტები და მათი მედიასაშუალებები. ეს არის მათი მთავარი მამხილებელი“ - განაცხადა მამუკა მდინარაძემ.
