სამართლიანად ჩატარდა თუ არა არჩევნები
დისკრეციული პირობები არ ექნება არცერთ კონფესიას, მაგრამ დარჩება ალტერნატიული სამსახური - ჯუანშერ ბურჭულაძე
16-12-2022
საქართველოს თავდაცვის მინისტრმა ჯუანშერ ბურჭულაძემ თავდაცვის ახალი კოდექსით გათვალისწინებულ ცვლილებაზე ისაუბრა, რაც გამორიცხავს „რელიგიური ორგანიზაციების“ შესაძლებლობას, დაეხმარონ ცალკეულ პირებს, თავია არიდონ სამხედრო სავალდებულო სამსახურში გაწვევას.
როგორც მინისტრმა აღნიშნა, თავის არიდების ძირითადი მიზეზი სასულიერო პირის სტატუსის მოპოვებაა. მისი განცხადებით, ყველა რელიგიის წარმომადგენელი სამხედრო ვალდებულია, მაგრამ თუ მათი რელიგია და მრწამსი არ აძლევს შესაძლებლობას გაიარონ სამხედრო სამსახური, ისინი გაივლიან ალტერნატიულ სამსახურს.
თავდაცვის მინისტრმა სამართლებრივ რეგულირებაზეც ისაუბრა და აღნიშნა, რომ დისკრეციული პირობები არ ექნება არცერთ კონფესიას, მაგრამ დარჩება ალტერნატიული სამსახური.
„დისკრეციული პირობები არ ექნება არცერთ კონფესიას, თუმცა, მე უკვე აღვნიშნე და კიდევ ერთხელ მინდა ხაზი გავუსვა, რომ შინაარსობრივი პრიმატი, ამ შემთხვევაში, რა თქმა უნდა, აღმატებული უნდა ყოფილიყო და ჩვენ ის პერიოდი ალბათ ვერ გავითვალისწინეთ, რომ ასეთი პრობლემა შეიძლებოდა შექმნოდა ქვეყანას ამის გამო. ეს მომენტი გავუშვით, როდესაც ჩვენ არ შევედით შინაარსობრივი ანალიზის გაკეთებაში, ის რეალურად ახორციელებს სასულიერო პირის ფუნქციებს თუ არა. ეს რა თქმა უნდა, ძალიან ხელოვნური და მოგონილი იყო, ალბათ ორიენტირებული ძირითადად ხელის მოთბობაზე. ეს აღარ იქნება, თუმცა იმ ალტერნატივას ჩვენ ვტოვებთ, თუ ობიექტური მიზეზია, როდესაც ადამიანს უბრალოდ არ სურს, რომ გაიაროს საბრძოლო მომზადება და დაიჭიროს ხელში იარაღი. მათთვის ისევ დარჩება ალტერნატიული სამსახური“, - განაცხადა მინისტრმა.
