,,ჰენდიკრაფტი": პირველი ქართული საძილე ტომარა ბავშვებისთვის

22-02-2023

,,ჰენდიკრაფტი" საბავშვო განმავითარებელი სათამაშოების, ტანსაცმლისა და ტექსტილის მწარმოებელი ერთ-ერთ პიონერი კომპანიაა საქართველოში. ბრენდის ისტორია 2017 წლიდან იწყება, როცა ახალბედა დედამ გადაწყვიტა, იმპორტირებული პროდუქციის შეძენის ნაცვლად, მივიწყებული ჰობი გაეცოცხლებინა და თავად შეექმნა ტანსაცმელი და აქსესუარები ახალშობილისთვის.

პატარა სამკერვალოს გახსნით თამარ კობახიძემ დიდი მიზნების განხორციელება დაიწყო და დღეს „ჰენდიკრაფტის" პროდუქცია უამრავ ქალს უმარტივებს დედობის პროცესს. აღსანიშნავია, რომ  „ჰენდიკრაფტს" ეკუთვნის საქართველოში შექმნილი პირველი საძილე ტომარა ჩვილებისთვის.  სწორედ ეს იყო პროდუქტი, რომელმაც ბრენდის თავდაპირველი პოპულარობა განაპირობა.

„ჰენდიკრაფტის" პროდუქციის მთავარი ფუნქცია ცხოვრების გამარტივებასთან ერთად მშობლებისა და ბავშვების ხარისხიანი ინტერაქციის ხელშეწყობაა. ამ მიზნით, კომპანიამ შექმნა განმავითარებელი ხალიჩები, რომელიც, ისევე როგორც „ჰენდიკრაფტის" სხვა პროდუქტები, ეკოლოგიურად სუფთა 100%-იანი ბამბის ქსოვილისგან მზადდება, არის რეცხვადი და სრულად შეესაბამება სათამაშოების ევროპულ სტანდარტს EN71.

,,პროდუქციის დიზაინზე მუშაობა ღრმა ძიების პროცესია, იმის გახსენება, თუ რა გვინდოდა გვქონოდა ბავშვობაში, რა გაგვახარებდა, როგორი თამაში მოგვეწონებოდა და ა.შ. რაც მთავარია, ჩვენი ყველა სათამაშოს შექმნის დროს პირველი მომხმარებლები ჩვენი გუნდის, თანამშრომლების შვილები არიან" - თამარ კობახიძე, „ჰენდიკრაფტის" დამფუძნებელი.

,,ჰენდიკრაფტის" პროდუქცია საზღვრების მიღმაც საკმაოდ პოპულარულია. კომპანია წარმოდგენილია ელექტრონული კომერციის ისეთ ვეგვერდებზე, როგორიცაა Etsy და Amazon. გუნდი აქტიურად მუშაობს უცხოურ ბაზარზე ფიზიკურ ფორმატში გაყიდვაზე. სააგენტოს ,,აწარმოე საქართველოში" ინიციატივით, კომპანია წარმოდგენილი იყო უმსხვილეს გამოფენაზე Spielwarenmesse, სადაც ქართულმა საბავშვო პროდუქციამ დიდი ინტერესი და მოწონება დაიმსახურა.

,,სააგენტოს როლი უმნიშვნელოვანესია თითოეული მეწარმისთვის, რადგან საშუალება გვეძლევა ჩვენი პროდუქტები უცხოელ მომხმარებლებსაც ვაჩვენოთ. ვფიქრობ, ექსპორტის წახალისებისთვის სწორედ მსგავსი ტიპის გამოფენებში მონაწილეობის მიღებაა აუცილებელი" - თამარ კობახიძე, „ჰენდიკრაფტის" დამფუძნებელი.

,,ჰენდიკრაფტი" სამომავლო გეგმებში საერთაშორისო პლატფორმებზე ბრენდის განვითარება და პოტენციურ მყიდველეთან აქტიური თანამშრომლობაა. კომპანიას იმედოვნებს, რომ უახლოეს ორ წელში უკვე სრულფასოვნად იქნება რამდენიმე ქვეყანაში წარმოდგენილი.

კომპანიის დამფუძნებელი დამწყებ მეწარმეებს ურჩევს, არ შეუშინდნენ სირთულეებს, რადგან ამ გზის გავლის გარეშე წარმატება არ მიიღწევა.

,,იყო ქალი მეწარმე საკმაოდ რთული და გამოწვევებით სავსეა. თუმცა, შეუძლებელი არაფერია, არ შეუშინდეთ სირთულეებს და თუკი იდეა გაქვთ, აუცილებლად სცადეთ თავი მეწარმეობაში"- თამარ კობახიძე, „ჰენდიკრაფტის" დამფუძნებელი.