„ტურიზმი და მწვანე ინვესტიციები“- ბაკალავრიატის სტუდენტებისთვის კონკურსი გაიმართება

19-03-2023

საქართველოს ტურიზმის ეროვნული ადმინისტრაციისა და კურორტების განვითარების სააგენტოს მხარდაჭერით, კავკასიის უნივერსიტეტის ტურიზმის სკოლა კონფერენციას „ტურიზმი და მწვანე ინვესტიციები“ გამართავს. ამის შესახებ ინფორმაციას ტურიზმის ეროვნული ადმინისტრაცია ავრცელებს.

მათივე ინფორმაციით, კონფერენციაში მონაწილეობის მიღება საქართველოში აკრედიტებული უნივერსიტეტების ბაკალავრიატის სტუდენტებს შეუძლიათ.

„სტუდენტებით დაკომპლექტებულმა გუნდებმა ნაშრომები უნდა მოამზადონ ტურიზმში მწვანე ინვესტიციების შესაძლებლობების შესახებ, მათ მიერ შერჩეულ (ქვეყნის, კურორტის, ქალაქის, სოფლის, სასტუმროს ან სხვა ტურიზმის სერვისის მიმწოდებლის) დონეზე. გამარჯვებული გუნდი სპეციალური პრიზებით დაჯილდოვდება, კონფერენციის ფინალურ ეტაპზე გასულ ყველა გუნდს გადაეცემა სერტიფიკატი. ანგარიშები ტურიზმის ეროვნული ადმინისტრაციის ელექტრონულ ბიბლიოთეკაში აიტვირთება.

კონფერენციის მიზანია ხელი შეუწყოს ტურიზმის ეროვნული ადმინისტრაციისა და უნივერსიტეტების თანამშრომლობას და სტუდენტების ჩართულობას ტურიზმის განვითარების საკითხებში.

მნიშვნელოვანი თარიღები:

30 მარტი - გუნდების რეგისტრაციის ბოლო ვადა. რეგისტრაციისთვის ეწვიეთ ბმულს;

6 მაისი - რეგისტრირებული გუნდების ანგარიშების მიღების ბოლო ვადა (მოცულობა 10-15 გვერდი);

10 მაისი - ფინალურ ეტაპზე გასული გუნდების გამოვლენა;

21 მაისი - პრეზენტაციების და გამოგზავნილი ანგარიშების საფუძველზე გამარჯვებული გუნდის გამოვლენა“,- აღნიშნულია ინფორმაციაში.