2023 წლის I კვარტალში ტელე და რადიო მაუწყებლების სარეკლამო შემოსავალმა 15.6 მილიონი ლარი შეადგინა

5-05-2023

2023 წლის პირველ კვარტალში სატელევიზიო და რადიო მაუწყებლების ჯამური სარეკლამო შემოსავალი წინა წლის იმავე პერიოდთან შედარებით, 12.5%-ით შემცირდა და 15.6 მილიონი ლარი შეადგინა. 2023 წლის პირველ კვარტალში ტელევიზიების კომერციული რეკლამიდან მიღებული თანხა 14.1 მილიონ ლარს შეადგენს, რაც წინა წლის იმავე პერიოდთან შედარებით, 2.2 მილიონი ლარით ნაკლებია. ტელემაუწყებლების სარეკლამო შემოსავლების 66.7% პირდაპირმა რეკლამამ შეადგინა, 2022 წლის პირველ კვარტალთან შედარებით კი, სპონსორობის წილი 1.2%-ით, ხოლო პროდუქტის განთავსების წილი 5.5%-ით გაიზარდა.

რაც შეეხება რადიომაუწყებლებს, მათ მიერ 2023 წლის პირველ კვარტალში მიღებული სარეკლამო შემოსავლები წინა წლის იმავე პერიოდთან შედარებით, 2.6%-ითაა გაზრდილი და 1.5 მილიონ ლარს შეადგენს, საიდანაც პირდაპირ რეკლამას 87.82%, ხოლო სპონსორობას - 12.16% უკავია.

კომერციული სარეკლამო შემოსავალი კომერციულ რეკლამას, სპონსორობას, პროდუქტის განთავსებას, ტელეშოპინგსა და კომერციულ განცხადებებს მოიცავს.

შეგახსენებთ, რომ 2022 წლის 1 მარტიდან აზარტული თამაშების რეკლამა კანონით აღარ არის დაშვებული. რეგულაციის ამოქმედებამდე კი, აზარტული თამაშების ორგანიზატორი კომპანიები მაუწყებლების მსხვილ დამფინანსებლებს წარმოადგენდნენ. კერძოდ, გასული წლის იმავე პერიოდში, აზარტული თამაშების სექტორიდან მიღებულმა სარეკლამო შემოსავალმა 4.8 მილიონი ლარი შეადგინა.