საქართველოსთან ფრენების აკრძალვის მოხსნისკენ აშშ-ს და ევროკავშირის წარმომადგენლები რუსეთს 2019 წელს მოუწოდებდნენ

10-05-2023

საქართველოსთან ფრენების აკრძალვის მოხსნისკენ აშშ-ს და ევროკავშირის წარმომადგენლები რუსეთს 2019 წელს მოუწოდებდნენ. არქივი ინახავს საქართველოში აშშ-ის ელჩის მოვალეობის შემსრულებლის ელიზაბეთ რუდის 2019 წლის ივლისში გაკეთებულ განცხადებას, სადაც იგი რუსეთს საქართველოში ფრენების აკრძალვის მოხსნისკენ მოუწოდებდა.

„რუსეთის ფედერაციის მიერ ფრენების შეჩერების ზომები არაპროპორციული პასუხი იყო და ახლა, როდესაც საქართველოსა და რუსეთის ლიდერებმა გამოთქვეს მზადყოფნა ურთიერთობების სტაბილიზაციისთვის, ჩვენ მოვუწოდებთ რუსეთს გააუქმოს ფრენების აკრძალვა, მისცეს თავის მოქალაქეებს საქართველოში ჩამოსვლის საშუალება და აღდგეს ადამიანებს შორის კონტაქტი - აცხადებდა მაშინ ელიზაბეთ რუდი.

აქვე ელჩი აღნიშნავდა, რომ „ეკონომიკური და სავაჭრო ურთიერთობები შედის როგორც ქართველი, ასევე რუსი ხალხის ინტერესებში“. 

საქართველოში ფრენების აკრძალვის შესახებ რუსეთის გადაწყვეტილებას გაუმართლებელ და არაპროპორციულ ნაბიჯად მიიჩნევდა ევროკავშირის საგარეო საქმეთა და უსაფრთხოების პოლიტიკის საკითხებში პრესსპიკერი მაია კოციანჩიჩი.

„რუსეთსა და საქართველოს ურთიერთობებში ბოლო დროს განვითარებული მოვლენები ორივე ქვეყნის მოქალაქეზე უარყოფითად აისახება. საქართველოში ფრენების აკრძალვის შესახებ რუსეთის გადაწყვეტილებას გაუმართლებელ და არაპროპორციულ ნაბიჯად ვთვლით,“ - ნათქვამია მაია კოციანჩიჩის 2019 წლის ივლისში გაკეთებულ განცხადებაში.