სამართლიანად ჩატარდა თუ არა არჩევნები
ბექა ოდიშარია მიხეილ დაუშვილს: არასერიოზულად იცით როდის გამოიყურებით? თქვენს ლიდერს რომ ბაძავთ ინტონაციით და პარტიული „ბრეიქდანსით“
19-05-2023
იცოდით თუ არა ამგვარი დანაშაულების შესახებ მაშინ, როდესაც იყავით ბიზნესომბუდსმენი - „ქოლცენტრებთან“ დაკავშირებული ამ კითხვით უმრავლესობის წევრმა ბექა ოდიშარიამ პარტია „საქართველოსთვის“ დეპუტატს მიხეილ დაუშვილს პარლამენტის პლენარულ სხდომაზე მიმართა.
ოდიშარია ასევე დაინტერესდა, ენდობა თუ არა დაუშვილი გერმანელ, ესპანელ და სხვა ევროპელ პარტნიორ სამართალდამცავებს.
“თუ გახსენდებათ, რომ შურაცხყოფა მომეყენებინოს თქვენთვის, მაშინაც კი, როდესაც წინა დღეს ამ სასახლის ეზოში დედას მეფიცებოდით, რომ ჩვენი გუნდიდან გასვლას არ აპირებდით და თურმე უკვე გასულიც იყავით და გადასულიც.
ეს საზოგადოებამ შეაფასა და მაშინაც კი ეს დავტოვე თქვენ გადაწყვეტილებად და თქვენ თავისუფლებად და მივიჩნიე თქვენს გემოვნებად.
არასერიოზულიაო, აბსოლუტურად სერიოზულ შეკითხვას გისვამთ, იცოდით თუ არა ამგვარი დანაშაულების შესახებ მაშინ, როდესაც იყავით ომბუდსმენი და მეორე გკითხეთ - ენდობით თუ არა გერმანელ, ესპანელ და სხვა ჩვენს ევროპელ პარტნიორ სამართალდამცავებს.
რაც შეეხება არასერიოზულობას, ცოტა გაუფრთხილდით და გაფილტრეთ თქვენი საუბარი, თორემ მიიღებთ იგივეს. არასერიოზულად იცით როდის გამოიყურებით? თქვენს ლიდერს რომ ბაძავთ ინტონაციით და კიდევ ხელებში მტევნების გრეხვით, თქვენი პარტიული „ბრეიქდანსით“, აი, მაშინ გამოიყურებით არასერიოზულად და კომიკურადაც, ეს კარგად დაიმახსოვრეთ“- განაცხადა ბექა ოდიშარიამ.
