სამართლიანად ჩატარდა თუ არა არჩევნები
საგარეო ურთიერთობათა კომიტეტის დელეგაციამ დიდი ბრიტანეთის თემთა პალატაში შეხვედრები გამართა
24-05-2023
საგარეო ურთიერთობათა კომიტეტის დელეგაციამ, ლონდონში ოფიციალური ვიზიტის ფარგლებში, დიდი ბრიტანეთის თემთა პალატაში შეხვედრები გამართა.
საგარეო ურთიერთობათა კომიტეტის თავმჯდომარე, ნიკოლოზ სამხარაძე და დელეგაციის წევრები თემთა პალატის საგარეო ურთიერთობათა კომიტეტის თავმჯდომარეს, ალისია ქერნზს, განათლების კომიტეტის თავმჯდომარეს, რობინ უოკერს, საქართველოსთან მეგობრობის ჯგუფის ხელმძღვანელს, ჯონათან ჯანოგლის და ჯგუფის წევრებს შეხვდნენ.
საგარეო ურთიერთობათა კომიტეტის თავმჯდომარესთან შეხვედრისას, ორმხრივი ურთიერთობების გაღრმავებაზე და საქართველოსა და დიდ ბრიტანეთს შორის თავდაცვისა და უსაფრთხოების სფეროში თანამშრომლობაზე ისაუბრეს.
მხარეებმა ხაზი გაუსვეს სტრატეგიული პარტნიორობის მნიშვნელობასა და უორდროპის სტრატეგიული დიალოგის საპარლამენტო განზომილების მეტად გააქტიურების მნიშვნელობას.
შეხვედრაზე ასევე ისაუბრეს რეგიონულ უსაფრთხოებასა და რუსეთიდან მომდინარე საფრთხეებზე, ნატო-ს გაფართოებაზე და ალიანსში საქართველოს ინტეგრაციის პროცესში დიდი ბრიტანეთის მხარდაჭერაზე.
მხარეები შეთანხმდნენ, რომ საგარეო ურთიერთობათა კომიტეტის დელეგაცია მიმდინარე წელს, საქართველოს, ოფიციალური ვიზიტით ეწვევა.
საპარლამენტო დელეგაციამ შეხვედრა გამართა განათლების კომიტეტის თავმჯდომარესთან, სადაც სასკოლო, პროფესიული და უმაღლესი განათლების შესახებ ისაუბრეს.
ყურადღება გამახვილდა განათლების გაციფრულებაზე, რაც განათლების სფეროში ელექტრონული სისტემების განვითარებას გულისხმობს.
ხაზი გაესვა ამ მიმართულებით გამოცდილების გაზიარების მნიშვნელობას. საქართველოს დელეგაციის წარმომადგენლებმა ბრიტანელ კოლეგებს გააცნეს ის პროექტები და გეგმები, რომელიც ქვეყანას აქვს, მათ შორის, განათლების კოდექსის მიღებასთან, პროფესიული განათლების შესაძლებლობების განვითარებასთან და უმაღლესი საგანმანათლებლო სისტემის ინტერნაციონალიზაციასთან დაკავშირებით.
შეხვედრა ასევე გაიმართა საქართველოსთან მეგობრობის ჯგუფის ხელმძღვანელ ჯონათან ჯანოგლისთან და ჯგუფის წევრებთან, სადაც განხილვის მთავარი თემა იყო ორმხრივი ურთიერთობების დღის წესრიგში არსებული ყველა მნიშვნელოვანი საკითხი, ასევე საქართველოსთვის ისეთი აქტუალური საკითხები, როგორიცაა უსაფრთხოების გამოწვევები, ევროკავშირში გაწევრიანება, რეგიონში და სამეზობლოში არსებული ვითარება, უკრაინაში მიმდინარე რუსული აგრესია.
შეხვედრაზე ისაუბრეს დიდ ბრიტანეთში მოახლოებულ არჩევნებზე და ადგილობრივი არჩევნების შედეგებზე, ასევე, დიდი ბრიტანეთის პოლიტიკური სპექტრის მიდგომაზე, როგორც უკრაინაში მიმდინარე რუსულ აგრესიასთან, ასევე ზოგადად, ევროპის უსაფრთხოებასთან დაკავშირებით.
დელეგაციის შემადგენლობაში არიან საგარეო ურთიერთობათა კომიტეტის თავმჯდომარის პირველი მოადგილე, მარიამ ლაშხი და წევრები: ირაკლი მეზურნიშვილი და ხათუნა სამნიძე.
