სამცხე-ჯავახეთის რეგიონული ტელეკომპანიის, „მეცხრე არხის“ ინფორმაციით, ინციდენტში 8 ადამიანი მონაწილეობდა, BP-ის სამი თანამშრომელი და მეორე მხარეს ხუთი ადგილობრივი ახალგაზრდა.

პოლიციამ ინციდენტის შემდეგ, დილის 7-დან 10 საათამდე პერიოდში ახალგაზრდები დაკითხა, შემდეგ გაუშვეს, შუადღით კი პროკურატურა სასამართლოში მათი დაკავების შუამდგომლობით შევიდა, - იუწყება ადგილობრივი ტელეკომპანია ერთ-ერთი დაკავებულის ადვოკატზე, ნუგზარ სამარჯიშვილზე დაყრდნობით.

„საქმეში იარაღი არსად ფიგურირებს, მხოლოდ ერთს აქვს ჩვენება მიცემული, მგონი ბლაგვი საგანი იყოო, თუმცა კადრებში არანაირი საგანი არ ჩანს და მხოლოდ ჩვენების საფუძველზე მოხდა მათი დაკავება“, - ციტირებს ადვოკატის კომენტარს ტელევიზია.

კიდევ ერთი დაკავებულის ადვოკატი ამბობს, რომ მისი დაცვის ქვეშ მყოფი სათვალთვალო ვიდეოკამერის მიერ გადაღებული მასალების მიხედვით ინციდენტში საერთოდ არ ჩარეულა, ბრალი კი ხულიგნობის მუხლით წაუყენეს. „თან პროკურატურამ ბრალდება დაუმძიმა, თითქოს გამოძიებას დაემალა. არადა, სახლში იყო და არსად წასულა“, - აღნიშნავს ადვოკატი.

გამოძიება სისხლის სამართლის კოდექსის 239–ე მუხლის მესამე ნაწილით დაიწყო, რაც გულისხმობს ხულიგნობას ძალადობით ან ძალადობის მუქარით და ისჯება თავისუფლების აღკვეთით ვადით 4–დან 7 წლამდე.

წინასასამართლო სხდომა 2018 წლის 25 იანვარს ჩაინიშნა.

წყარო: reginfo.ge