სამართლიანად ჩატარდა თუ არა არჩევნები
საერთაშორისო ინვესტორი: საქართველოში ინვესტირების გადაწყვეტილება ქვეყანის ეკონომიკური მიღწევებითა და ადამიანური კაპიტალის შესაძლებლობების გამო მივიღეთ
31-10-2023
საქართველოში ინვესტირების გადაწყვეტილება ქვეყანაში არსებული ეკონომიკური მიღწევებითა და ადამიანური კაპიტალის შესაძლებლობების გამო მივიღე, - ამის შესახებ ბრიტანული კომპანია Hives CX-ის დირექტორმა შერიფ კამელმა განაცხადა.
ბრიტანული კომპანია ინვესტირებას ბიზნესი პროცესების დისტანციურად მიწოდების (BPO) დარგში განახორციელებს და IT სერვისების დისტანციურად მიწოდებასა და პროგრამული უზრუნველყოფის მიმართულებით იმუშავებს.
„ერთ-ერთი მთავარი მიზეზი, რის გამოც აქ ინვესტირება გადავწყვიტე, ქვეყნის მთავრობის, ასევე სახელმწიფო სააგენტოს „აწარმოე საქართველოში" დიდი მხარდაჭერა, ბიზნესის რეგისტრაციის სისწრაფე და სიმარტივეა. განსხვავებით დიდი ბრიტანეთისგან, პოლონეთისგან და ეგვიპტისგან, საქართველოში რეგისტრაციის პროცესი საკმაოდ მარტივია. ასევე, უნდა აღნიშნოს, რომ BPO ინდუსტრია ადამიანურ კაპიტალსა და მათ უნარებზე დამყარებული ინდუსტრიაა. შესაბამისად, ჩემს გადაწყვეტილებაზე გავლენა იქონია საქართველოში ნიჭიერმა ადამიანებმა და მათმა უნარებმა", - განაცხადა შერიფ კამელმა, Hives CX Georgia-ს დამფუძნებელმა.
მისივე თქმით, საქართველოში ინვესტირებით მას შემდეგ დაინტერესდა, როცა ექვსი თვის წინ სააგენტოს „აწარმოე საქართველოში" მოწვევით BPO სექტორის სხვა საერთაშორისო კომპანიების წარმომადგენლებთან ერთად, ქვეყანას ეწვია და აქ არსებულ საინვესტიციო შესაძლებლობებს გაეცნო.
შერიფ კამელი საქართველოს მეორედ გასულ კვირას სტუმრობდა „აწარმოე საქართველოში" ორგანიზებით გამართულ BPO სექტორის სამიტზე, რომელსაც 15-მდე საერთაშორისო კომპანია ესწრებოდა.
სააგენტოს „აწარმოე საქართველოში" ორგანიზებით გამართულ BPO ინდუსტრიის სამიტს აშშ-დან, კანადიდან, ავსტრალიიდან, დიდი ბრიტანეთიდან, პოლონეთიდან, ინდოეთიდან, კოლუმბიიდან და შვეიცარიიდან 15-მდე კომპანია ესწრებოდა.
სამიტის ფარგლებში სტუმრებმა შეხვედრები გამართეს როგორც კერძო, ასევე საჯარო სექტორის წარმომადგენლებთან, ბიზნეს ასოციაციებთან, საერთაშორისო ორგანიზაციებთან და საქართველოში მოქმედ უცხოურ კომპანიებთან.
ღონისძიება საქართველოში მეორედ ჩატარდა და მისი მიზანი საქართველოს, როგორც საინვესტიციო მიმართულების პოპულარიზაცია გახლდათ.
