სამართლიანად ჩატარდა თუ არა არჩევნები
აფხაზეთის დეფაქტო პრემიერმინისტრად ვალერი ბგანბა დაინიშნა
18-09-2018
აფხაზეთის დეფაქტო პრემიერმინისტრად ვალერი ბგანბა დაინიშნა, რომელიც მანამდე პარლამენტის სპიკერის თანამდებობას იკავებდა. ინფორმაციას რუსული მედია ავრცელებს.
აფხაზეთის დეფაქტო პრეზიდენტის რაულ ხაჯიმბას თქმით, მან პრემიერად ბგანბას დანიშვნის ბრძანებას ხელი უკვე მოაწერა. აქამდე დეფაქტო პრემიერის მოვალეობებს დაურ არშბა ასრულებდა.
ოკუპირებული აფხაზეთის დეფაქტო პრემიერმინისტრი გენადი გაგულია ავარიაში 8 სექტემბერს, გვიან საღამოს დაიღუპა.
აფხაზეთის ე.წ. მინისტრთა კაბინეტის ვებგვერდის ცნობით, ავარია ფსოუ-სოხუმის მონაკვეთზე მოხდა. „პრემიერმინისტრის ავტომობილი გადაადგილდებოდა აფხაზეთის ოფიციალური დელეგაციის კორტეჟში, რომელიც სირიის არაბული რესპუბლიკიდან ბრუნდებოდა. წინასწარი ინფორმაციით, უბედური შემთხვევის დროს სხვები არ დაშავებულან“, - ნათქვამია განცხადებაში.
გენადი გაგულია 70 წლის იყო. პირველად ოკუპირებული აფხაზეთის დეფაქტო პრემიერმინისტრის თანამდებობაზე მან 1995-1997 წლებში იმუშავა, შემდეგ - 2002-2003 წლებში. 2003-2004 წლებში აფხაზეთის დეფაქტო პრეზიდენტის ადმინისტრაციის უფროსი იყო, 2004 წლიდან აფხაზეთის სავაჭრო-სამრეწველო პალატას ხელმძღვანელობდა. 2018 წლის 25 აპრილს ის კვლავ დეფაქტო პრემიერმინისტრად დანიშნეს.
