ფინანსთა სამინისტროს შემოსავლების სამსახური საქართველოს მიერ საერთაშორისო სანქციების აღსრულებასთან დაკავშირებით მედიაში გავრცელებულ სიუჟეტს ეხმაურება, რომლის თანახმად ბრიტანულმა მედიასაშუალება Sky News-მა გამოაქვეყნა ქვეყნის საბაჟო სტატისტიკის დეტალური კვლევა, რომლის მიხედვითაც, სამხედრო დანიშნულების საქონელი/ტექნიკა სანქციების მიუხედავად, შედის რუსეთის ფედერაციაში და რომ აღნიშნულ კვლევაში ტრანზიტულ ქვეყნებს შორის დასახელებულია საქართველო.

ასევე, სიუჟეტის თანახმად, კვლევაში აღწერილი იყო კონკრეტული სქემაც თუ როგორ აღწევს, მათ შორის, საქართველოს გავლით, ორმაგი დანიშნულების მქონე პროდუქცია რუსეთამდე.

აღნიშნულ ინფორმაციას ფინანსთა სამინისტროს შემოსავლების სამსახური კატეგორიულად უარყოფს. 

როგორც უწყებაში აცხადებენ, თავად Sky News-ის მიერ, მომზადებულ სიუჟეტში საქართველო ნახსენები იყო ზოგადად, როგორც რუსეთთან სახმელეთო საზღვრის მქონე სახელმწიფო და სხვა პოსტსაბჭოთა ქვეყნებისგან განსხვავებით, არც კვლევაში დასახელებულა არცერთი ფაქტი თუ რა სახის და რა რაოდენობის საქონლის ექსპორტი განხორციელდა დიდი ბრიტანეთიდან საქართველოს დანიშნულებით.

ასევე, როგორც განცხადებაშია აღნიშნული, არც Sky News-ის მხრიდან და არც ქართული მედიის მხრიდან, რეპორტაჟის მომზადების პროცესში, არავინ დაკავშირებია ფინანსთა სამინისტროს შემოსავლების სამსახურს კონკრეტული ფაქტების გადასამოწმებლად და ოფიციალური სტატისტიკის გამოთხოვის მიზნით.

უწყება მოუწოდებს მედიასაშუალებებს, მსგავსი საკითხების გასარკვევად დაუკავშირდნენ სანქციების აღსრულებაზე პასუხისმგებელ უწყებას - ფინანსთა სამინისტროს შემოსავლების სამსახურს:

„ფინანსთა სამინისტროს შემოსავლების სამსახური ეხმაურება 22 თებერვალს, ტელეკომპანია „ფორმულას“ მიერ, მომზადებულ სიუჟეტში გამოთქმულ მორიგ დეზინფორმაციას, რომელიც საქართველოს მიერ საერთაშორისო სანქციების აღსრულებას ეხება.

ტელეკომპანიამ განაცხადა, რომ ბრიტანულმა მედიასაშუალება Sky News-მა გამოაქვეყნა ქვეყნის საბაჟო სტატისტიკის დეტალური კვლევა, რომლის მიხედვითაც, სამხედრო დანიშნულების საქონელი/ტექნიკა სანქციების მიუხედავად, შედის რუსეთის ფედერაციაში და რომ თითქოს აღნიშნულ კვლევაში ტრანზიტულ ქვეყნებს შორის დასახელებულია საქართველო. ამასთან, ტელეკომპანია „ფორმულას“ თქმით, კვლევაში აღწერილი იყო კონკრეტული სქემაც თუ როგორ აღწევს, მათ შორის, ჩვენი ქვეყნის გავლით, ორმაგი დანიშნულების მქონე პროდუქცია რუსეთამდე - რაზეც კატეგორიულად ვაცხადებთ, რომ არის სრული სიცრუე და ყალბი პროპაგანდა.

აღსანიშნავია, რომ თავად Sky News-ის მიერ, მომზადებულ სიუჟეტში საქართველო ნახსენები იყო ზოგადად, როგორც რუსეთთან სახმელეთო საზღვრის მქონე სახელმწიფო და სხვა პოსტსაბჭოთა ქვეყნებისგან განსხვავებით, არც კვლევაში დასახელებულა არცერთი ფაქტი თუ რა სახის და რა რაოდენობის საქონლის ექსპორტი განხორციელდა დიდი ბრიტანეთიდან საქართველოს დანიშნულებით. სამწუხაროა, რომ არც Sky News-ის მხრიდან და არც ქართული მედიის მხრიდან, რეპორტაჟის მომზადების პროცესში, არავინ დაკავშირებია ფინანსთა სამინისტროს შემოსავლების სამსახურს კონკრეტული ფაქტების გადასამოწმებლად და ოფიციალური სტატისტიკის გამოთხოვის მიზნით.

ოფიციალური სტატისტიკის მიღებისა და გავრცელების შემდგომ, საზოგადოება გაიგებდა, რომ 2023 წლის მონაცემებით, მაღალი რისკის მქონე პრიორიტეტული საქონლის (რომელიც შესაძლოა გამოყენებული იქნეს სამხედრო მიზნებისთვის) დიდი ბრიტანეთიდან საქართველოში იმპორტის მაჩვენებელი მთლიანი იმპორტის მხოლოდ 1%-ს შეადგენს და საერთაშორისო სანქციების დაწესების შემდგომ 40%-ით არის შემცირებული.

ამასთან, აღნიშნული საქონლის იმპორტი სანქციების დაწესებამდე და მის შემდეგაც, განხორციელებულია უშუალოდ საქართველოში გამოსაყენებლად და არ მომხდარა მისი შემდგომი ექსპორტი სანქცირებულ ქვეყნებში.

კიდევ ერთხელ, ვაცხადებთ, რომ საქართველო სრულად და მტკიცედ იცავს საერთაშორისო სანქციების აღსრულების პროცედურებს და არ არსებობს ამის საპირისპირო დამადასტურებელი არცერთი ფაქტი. საერთაშორისო სანქციების დაწესების პირველივე დღეებიდან, საქართველოს ფინანსთა სამინისტროს შემოსავლების სამსახურში შექმნილია შესაბამისი სამუშაო ჯგუფი, რომელიც ახორციელებს აღნიშნული სანქცირებული საქონლის მკაცრ კონტროლს.

სწორედ სანქციების ეფექტური აღსრულების და პრევენციული ღონისძიებების გატარების ერთ-ერთი მაგალითია, შემოსავლების სამსახურის საბაჟო დეპარტამენტის მიერ სანქცირებული საქონლის უკან გაბრუნების შემთხვევები, საიდანაც 29 შემთხვევაში გამომგზავნი ან წარმოშობის ქვეყანა იყო დიდი ბრიტანეთი.

შემოსავლების სამსახური მოუწოდებს ადგილობრივ და საერთაშორისო მედიასაშუალებებს სანქციების აღსრულებასთან დაკავშირებულ საკითხებზე ინფორმაციის გავრცელებისას, იხელმძღვანელონ ოფიციალური წყაროებიდან და იმ შემთხვევაში თუ დამატებითი შეკითხვები იქნება აღნიშნულ რეგულაციებთან დაკავშირებით, განმარტებისთვის მიმართონ სანქციების აღსრულებაზე პასუხისმგებელ უწყებას - ფინანსთა სამინისტროს შემოსავლების სამსახურს“, - აღნიშნულია განცხადებაში.