ირაკლი კობახიძე: სტიგმატიზაციაზე საუბრობენ ადამიანები, რომლებიც ხელისუფლებას უწოდებენ რუსულს, პუტინისტურს, აქედან ჩანს, რომ ყველაფერი, რასაც ამბობენ, სინამდვილეში ფარსია

30-04-2024

გიგაურის და ლომჯარიას შავი ფულის გამოჩენა, რუსეთთან არაფერ კავშირში არ არის, შავ ფულს თუ გამოაჩენენ, ეს წაადგება მხოლოდ და მხოლოდ საქართველოს ეროვნულ ინტერესებს, - ამის შესახებ საქართველოს პრემიერ-მინისტრმა, ირაკლი კობახიძემ გადაცემა იმედი LIVE-ში განაცხადა.

როგორც პრემიერმა აღნიშნა, სტიგმატიზაციაზე საუბრობენ ადამიანები, რომლებიც ხელისუფლებას უწოდებენ რუსულს, პუტინისტურს და ა.შ. აქედან ჩანს, რომ ყველაფერი, რასაც ამბობენ, სინამდვილეში ფარსია.

„რეალურად ისინი ყველაფერს ქართულ უწოდებენ რუსულს, გასაგებია, რუსეთს აქვს ოკუპირებული ჩვენი ტერიტორიების 20 პროცენტი, ამიტომ მარტივია სტიგმატიზაცია. სტიგმატიზაციაზე როცა საუბრობენ ეს ადამიანები, ეს ხომ საერთოდ ღიმილისმომგვრელია. სტიგმატიზაციაზე გელაპარაკებიან ადამიანები, რომლებიც ხელისუფლებას უწოდებენ რუსულს, პუტინისტურს და ა.შ. აქედან ჩანს, რომ ყველაფერი, რასაც ისინი ამბობენ, სინამდვილეში არის ფარსი, მათი მოგონილია სტიგმატიზაცია - რუსული, პუტინისტური, კლანი და ა.შ. ეს არის მთლიანად მათი ხელწერა, ეს არის საბჭოური ხელწერა, რომელიც ახასიათებს ამ მდიდარ „ენჯეოებს" პირველ რიგში და არა მარტო მათ, მათ დონორებსაც ხშირ შემთხვევაში ახასიათებთ ეს ყველაფერი, აღარაფერს ვამბობ რადიკალურ ოპოზიციაზე. ეს ყველაფერი არის აბსოლუტური ფარსი, რა შუაშია რუსეთი. გიგაური საკუთარ შავ ფულს თუ გამოაჩენს ეს რუსეთთან რა კავშირშია, არაფერ კავშირში არ არის, ეს არის კავშირში მხოლოდ ქართული ინტერესებისა და საქართველოს სუვერენიტეტის დაცვასთან. ისეთ აბსურდზე მიდის საუბარი, რომ სერიოზული კომენტარის გაკეთებაც კი შეუძლებელია ამ ყველაფერთან დაკავშირებით. გიგაურის და ლომჯარიას შავი ფულის გამოჩენა რუსეთთან არაფერ კავშირში არ არის. თუ შავ ფულს გამოაჩენენ ეს ადამიანები, ეს წაადგება მხოლოდ და მხოლოდ საქართველოს ეროვნულ ინტერესებს", - განაცხადა ირაკლი კობახიძემ.