გურამ მაჭარაშვილი ანა წითლიძესთან დაპირისპირებაზე: ეს ხალხი მოწყურებულია ძალადობას, ისინი არიან პირსისხლიანი რეჟიმის წარმომადგენლები

1-05-2024

„ხალხის ძალის“ აღმასრულებელი მდივანი გურამ მაჭარაშვილი მასა და ანა წითლიძეს შორის პარლამენტში მომხდარ დაპირისპირებას გამოეხმაურა.

მაჭარაშვილის თქმით, წითლიძე არის პირსისხლიანი რეჟიმის წარმომადგენელი და სანამ ეს რეჟიმი არ გასამართლდება, მანამდე ქვეყანაში მშვიდობა ვერ დაისადგურებს.

„ყველა კარგად ვხედავდით რას ითხოვდა - ითხოვდა რევოლუციას და ფიზიკურ დაპირისპირებას. ეს ხალხი მოწყურებულია ძალადობას, ისინი არიან პირსისხლიანი რეჟიმის წარმომადგენლები. სწორედ ამიტომ ვამბობთ, რომ სანამ არ გასამართლდება ეს რეჟიმი და არ აიკრძალება „ნაციონალური მოძრაობა“, მანამდე სულ ვიქნებით ამ ძიძგილაობაში. სწორედ ამიტომ, ამას აუცილებლად გავაკეთებთ,“ - განაცხადა მაჭარაშვილმა.

ცნობისთვის, პარლამენტში „ნაციონალური მოძრაობის“ წევრი ანა წითლიძე და „ხალხის ძალის“ წევრი გურამ მაჭარაშვილი ერთმანეთს დაუპირისპირდნენ.

წითლიძემ მაჭარაშვილს სიტყვიერი შეურაცხყოფა მიაყენა, რის შემდეგაც მაჭარაშვილმა წითლიძეს საპასუხოდ მოღალატე უწოდა.