სამართლიანად ჩატარდა თუ არა არჩევნები
,,სტუმრიანობა აქვს, სჭირდება" - გორის დეპუტატმა სალომე ზურაბიშვილს 50 000 ლარი შესწირა
10-10-2018
გორის მაჟორიტარმა დეპუტატმა იოსებ მაკრახიძემ საპრეზიდენტო კანდიდატს სალომე ზურაბიშვილს 50 000 ლარი შესწირა. ამის შესახებ დეპუტატმა შიდა ქართლის საინფორმაციო ცენტრს განუცხადა.
მისი თქმით, იზიარებს სალომე ზურაბიშვილის მოსაზრებებს და ამბობს, რომ ქალბატონს ათასი სტუმრიანობა აქვს, რასაც ხარჯები მოსდევს.
,,მე ჩემი საქმიანობა მაქვს, საიდანაც დანაზოგი ყოველთვის მრჩება, აქედან გადავურიცხე თანხა. საარჩევნო კამპანიას ხარჯები აქვს, სტუმრიანობა აქვს და ამიტომ გადავურიცხე თანხა" - აცხადებს იოსებ მაკრახიძე.
მაკრახიძე კომპანია ,,იბოლიას" ფლობს, რომელმაც მიმდინარე წელს გორის მუნიციპალიტეტში რამდენიმე ტენდერი მოიგო. მისი ოჯახის საკუთრებაა კომპანია ,,შარაც". ის დიდი ხანია სამშენებლო სფეროშია და თანხები არაერთხეულ გადაურიცხა სხვა და სხვა დროს ხელისუფლებაში მყოფ მმართველ პარტიებს.
ასე მაგალითად:
2011 წელი - ერთიანი ნაციონალური მოძრაობა 100 000 ლარი
2012 წელი - ერთიანი ნაციონალური მოძრაობა - 25 000 ლარი
2016 წელი - ,,ქართული ოცნება" - 50 000 ლარი
2017 წელი - ,,ქართული ოცნება" - 20 000 ლარი (შპს შარა - მეუღლის კომპანია)
2018 წელი - სალომე ზურაბიშვილი ,,ქართული ოცნების მხარდაჭერილი კანდიდატი - 50 000 ლარი.
რაც შეეხება მის ძმას, ალექსანდრე მაკრახიძეს, რომელიც კომპანია ,,არქმშენსტუდია 2002"-ის დამფუძნებელი და ერთ-ერთი კონტრაქტორია ადგილობრივი მუნიციპალიტეტის შესყიდვების, მას 2012 წელს ,,ნაციონალური მოძრაობისთვის" 8 000 ლარი აქვს შეწირული.
