სამართლიანად ჩატარდა თუ არა არჩევნები
დავით ქართველიშვილი: როდესაც მოქმედი ევროკომისარი სატელეფონო საუბარში, გამჭვირვალობის კანონის მიღების შემთხვევაში ირაკლი კობახიძეს რობერტ ფიცოს ბედის გაზიარებით ემუქრება, ეს უკვე ფსკერიც არაა - ეს არის კატასტროფა
23-05-2024
„ხალხის ძალის“ წევრი დავით ქართველიშვილი პრემიერ-მინისტრის, ირაკლი კობახიძის იმ განცხადებას ეხმიანება, რომელიც აღნიშნავს, რომ „ხანგრძლივი შანტაჟის ფონზეც კი, გამაოგნებელი იყო მუქარა, რომელიც ერთ-ერთ ევროკომისართან სატელეფონო საუბრისას გაჟღერდა. კერძოდ, ჩემთან საუბარში, ევროკომისარმა ჩამოთვალა მთელი რიგი ზომები, რომლებიც დასავლელმა პოლიტიკოსებმა გამჭვირვალობის კანონზე ვეტოს დაძლევის შემდეგ შეიძლება მიიღონ და ამ ზომების ჩამოთვლისას ახსენა - „ხომ ნახეთ, ფიცოს რა დაემართა და ძალიან ფრთხილად უნდა იყოთო“.
ქართველიშვილის თქმით, როდესაც მოქმედი ევროკომისარი სატელეფონო საუბარში, გამჭვირვალობის კანონის მიღების შემთხვევაში, ირაკლი კობახიძეს რობერტ ფიცოს ბედის გაზიარებით ემუქრება. ეს უკვე ფსკერიც არაა - ეს არის კატასტროფა!!!
„როდესაც არაერთხელ გავამახვილეთ ყურადღება პოლიტიკურ ტერორზე, როგორც სასოწარკვეთილი ძალების იარაღზე - ამას ბევრი სკეპტიკურად შეხვდა. ორიოდე თვის წინ, საინტერესო გამოხმაურება მოჰყვა ტრამპის სიტყვებს ოჰაიოში გამართულ მიტინგზე, რომ „ის არ დაემსგავსებოდა აშშ-ის პირველ (რესპუბლიკური პარტიიდან) პრეზიდენტ აბრაამ ლინკოლნს, რომელსაც ესროლა მსახიობმა ჯონ ბუტმა“. ამას მომენტალურად მოჰყვა ნეოლიბერალური მედიაჰოლდინგის, MSNBC-ის წამყვანის, კიტ ოლბერმანის საშინელი კომენტარი: „ყოველთვის არის იმედი“. დემოკრატმა კონგრეს-ვუმენმა ქეითი პორტერმა (წარმომადგენელთა პალატა), თავის ბლოგში კი შემდეგი კომენტარი გააკეთა: „ტრამპი მალე წააგებს, ან ციხეში წავა, ან არ ვიცი, ინფარქტი დაარტყამს. მე არ ვიცი, როგორი იქნება მისი დასასრული, მაგრამ ეს დასასრული ნამდვილად ექნება“. კიდევ ერთმა დემოკრატმა კონგრესმენმა, დენ გოლდმანმა, „ლეგენდარულ“ ჯენ ფსაკისთან ინტერვიუში, უხეშად და ყოველგვარი უხერხულობის გარეშე განაცხადა, რომ ტრამპი უნდა იქნას „ლიკვიდირებული“. ეს არის მშრალი ფაქტები, ხოლო სლოვაკეთის პრემიერ-მინისტრზე თავდასხმა - ფსევდოლიბერალიზმის პირდაპირი დაკვეთის ხორცშესხმა. იმავე პერიოდში, დაკავებული იქნა კონკრეტული პირები, სერბეთის პრეზიდენტზე სავარაუდო თავდასხმის თავიდან არიდების პრევენციის ფარგლებში. გუშინდელ ინტერვიუში, საქართველოს პრემიერ-მინისტრმა წამოწია საკითხი საკუთარ პერსონალურ საფრთხეებზე და რისკებზე - ამანაც გამოიწვია ღლიცინი? და დღევანდელ სკანდალურ ინფორმაციას როგორ შევხვდეთ - როდესაც მოქმედი ევროკომისარი სატელეფონო საუბარში, გამჭვირვალობის კანონის მიღების შემთხვევაში, ირაკლი კობახიძეს რობერტ ფიცოს ბედის გაზიარებით ემუქრება. ეს უკვე ფსკერიც არაა - ეს არის კატასტროფა!!!“ - წერს დავით ქართველიშვილი.
