გურამ მაჭარაშვილი: ევროპულმა საზოგადოებამ უარი უთხრა ფსევდოლიბერალიზმს და აირჩია სისტემა, სადაც გადაწყვეტილებები ეროვნული ინტერესებიდან და არა სხვა ქვეყნის ან თუნდაც გაერთიანების ინტერესებიდან გამომდინარეობს

11-06-2024

„ევროპელმა საზოგადოებამ სულ სხვა ევროპაში გაიღვიძა„ - ასე აფასებს პარტია „ხალხის ძალის“ გენერალური მდივანი გურამ მაჭარაშვილი ევროპარლამენტის არჩევნების შედეგებს.

პარლამენტში, საგაზაფხულო სესიის პლენარულ სხდომაზე დეპუტატმა აღნიშნა, რომ ევროპამ გააკეთა არჩევანი არა სხვა ქვეყნებისა და გაერთიანებების, არამედ ეროვნულ ინტერსებზე.

მაჭარაშვილის თქმით, ევროპელმა ამომრჩეველმა დაინახა, რომ ზოგიერთ ევროპარლამენტარს ეგონა, თითქოს ისინი ამომრჩეველმა მიხეილ სააკაშვილისთვის აქციების გასამართად და არა ეროვნული ინტერესების გასატარებლად აირჩია.

დეპუტატის განმარტებით, ევროპარლამენტში ფსევდოლიბერალიზმის მარცხის კიდევ ერთი მიზეზი, კონგრესში გამართული სხდომა იყო, სადაც აშშ-ის კონგრესმენები ომი დემოკრატიის ზრდად გამოაცხადეს.

„ევროპარლამენტის არჩევნების შედეგებს ჩვენ შეგვიძლია ვუწოდოთ ევროპელი ხალხის ძალა ევროპაში. ევროპულმა საზოგადოებამ დაამტკიცა, რომ ევროპარლამენტის არჩევნების შემდეგ, როგორც არ უნდა დაკომპლექტდეს ევროპარლამენტი და ევროკავშირის სტრუქტურები ფაქტია - ევროპულმა საზოგადოებამ 10 ივნისს სულ სხვა ევროპაში გაიღვიძა. მან უარი უთხრა ფსევდო ლიბერალიზმს და აირჩია სისტემა, სადაც გადაწყვეტილებები ეროვნული ინტერესებიდან და არა სხვა ქვეყნის ან თუნდაც გაერთიანების ინტერესებიდან გამომდინარეობს. ფსევდოლიბერალიზმმა მარცხი განიცადა, რასაც ზოგი არ აღიარებს და მათ ვეტყვით, ფსევდო ლიბერალიზმი რომ არ დამარცხებულიყო, ევროპის წამყვან ქვეყნებში ასეთი ცვლილებები არ მოხდებოდა. საფრანგეთის პრეზიდენტი ვადამდელ არჩევნებს არ დანიშნავდა, ბელგიის პრემიერმინისტრი თანამდებობიდან არ გადადგებოდა, გერმანიის კანცლერის პარტია მესამე ადგილზე არ გავიდოდა და ევროპის წამყვან ქვეყნებში: იტალიაში, ავსტრიაში, ესპანეთში მემარჯვენე პარტიები არ გაიმარჯვებდნენ. საინტერესოა, ათეულობით მილიონ ევროპელს, რომლებიც არ დაეთანხმნენ საფრანგეთის, გერმანიის, ბელგიის ხელისუფლებებს, რადიკალი ოპოზიციონერები პუტინისტურ ამომრჩევლად თუ მოიხსენებენ. ალბათ ვერა, რადგან მათმა ერთ-ერთმა პატრონმა ვიოლა ფონ კრამონმა აღიარა შეცდომა და თქვა - მე რომ ჩემი ქვეყნის პრობლემებით დავკავებულიყავი და სხვა ქვეყნის საქმეებში არ ჩავრეულიყავი, დღეს ევროპარლამენტარი ვიქნებოდიო. მისი სიტყვებით, რომ ვთქვათ თურმე მხოლოდ პუტინი არ ყოფილა პრობლემა, აშშ და თავისი ქვეყნის დაზვერვა დაადანაშაულა უცხო ქვეყნების გავლენების გაზრდაში, ანუ ჩვენ რისთვისაც გამჭვირვალობის კანონი მივიღეთ და რასაც თვითონ გვიწუნებდა (უცხო ქვეყნების გავლენების შემცირება), ზუსტად ის ფაქტი დაასახელა თავისი არჩევნების წაგების მიზეზად. მოდით, მოკლედ განვიხილოთ რატომ დამარცხდა ფსევდო ლიბერალიზმი. საფრანგეთის პრეზიდენტი ჩვენ მოგვიწოდებდა, რომ საფრანგეთს სჭირდება გამჭვირვალობა და უსაფრთხოება და ამიტომ მივიღე ეს კანონი, თქვენ ეს ყველაფერი არ გჭირდებათ და გააუქმეთო. ამის თქმა იყო და რამდენიმე საათში, ფრანგი ხალხის გადაწყვეტილებით უკმაყოფილო საფრანგეთის პრეზიდენტმა ვადამდელი არჩევნები დანიშნა. სამწუხაროდ, გერმანიის კანცლერიც ხშირად იცლიდა საქართველოს უარგუმენტო კრიტიკისთვის და მასაც თავისმა ხალხმა შეახსენა, რომ საკუთარი ქვეყნის ინტერესები უფრო მაღლა უნდა დაეყენებინა, ვიდრე სხვა ქვეყნის ან გაერთიანების. ამის გამო გერმანელმა ხალხმა მისი პარტია მესამე ადგილზე გადაიყვანა. ზოგიერთ ევროპარლამენტარს ეგონა, რომ თავისი ქვეყნის ამომრჩეველმა ევროპარლამენტში იმისთვის აირჩია, რომ ევროპის უსაფრთხოებაზე და სუვერენიტეტის გაძლიერებაზე ფიქრის ნაცვლად, ევროპარლამენტში მიხეილ სააკაშვილის პლაკატებიანი აქციები უნდა ეტარებინა და საქართველოს ოპოზიციის სასარგებლო და საქართველოს სახელმწიფოს საწინააღმდეგო განცხადებები ეკეთებინა (ცხადია ეს ყველაფერი მატერიალური სარგებლის მიღების მიზნით). ანა ფოტიგა და ფონ კრამონი ჩვენი ჭკუის დარიგებით და შიდა პოლიტიკაში ჩარევით იყვნენ დაკავებული და აღმოჩნდა, რომ თურმე თავიანთი ქვეყნების საზოგადოების ლეგიტიმაციაც არ ჰქონიათ. ფსევდო ლიბერალიზმმა ევროპარლამენტის სამარცხვინო რეზოლუციებით, სადაც ევროსასამართლოს გადაწყვეტილებებიც კი უგულებელყვეს და სააკაშვილი პოლიტპატიმრად, ხოლო კეზერაშვილი მედია მენეჯერად გამოაცხადეს, პრაქტიკულად ფასი დაუკარგეს ევროპარლამენტის ინსტიტუციის რეზოლუციებს. ევროპელმა ხალხმა დაინახა, რომ ევროპარლამენტი არ ითვალისწინებს სტრასბურგის საერთაშორისო სასამართლოს გადაწყვეტილებებს, ეროვნული ქვეყნის მეთაურები უპირატესობას ანიჭებენ სხვა ქვეყნის ან ევროგაერთიანებების ინტერესებს, აი, სწორედ იქ დაიწყო ფსევდო ლიბერალიზმის მარცხი და იმატა მემარჯვენე პარტიების მხარდამჭერთა რიგებმა. ფსევდო ლიბერალიზმის მარცხის ერთ - ერთი მიზეზი გახლდათ ამერიკის კონგრესში კონგრესმენების მიერ ჩატარებული სხდომა, სადაც ომს ძლიერი დემოკრატია, ხოლო მშვიდობას - დემოკრატიის სისუსტე უწოდეს. სადაც პირდაპირ აღიარეს, რომ საქართველოს ხელისუფლებას არა ქართველი ხალხი - არჩევნებით, არამედ ამერიკის კონგრესმენები, ორი ქართველი მოწმის ჩვენებების საფუძველზე დააკომპლექტებდა. იმ ორ ქართველ მოწმეს ვასალური აზროვნება ევროპული ღირებულება რომ ჰგონია გასაგებია, მაგრამ ამერიკის კონგრესმენები, რომ რევოლუციისკენ მოუწოდებენ რადიკალ ოპოზიციონერებს - აქ იშიფრება ფსევდო ლიბერალების მიზნები, რომ ნებისმიერ ფასად, მათ შორის, პრემიერების მკვლელობის მცდელობებით და ფერადი თუ შავ-თეთრი რევოლუციებით, სხვა ქვეყნებში ომის ხარჯზე შეინარჩუნონ ძალაუფლება და ეკონომიკური აქტივები. აი, სწორედ ამ ვასალურ აზროვნებას არ დაეთანხმა ქართულ საზოგადოებასთან ერთად ევროპელი საზოგადოება და დარწმუნებული ვარ მომავალშიც, ქართულ და ევროპულ ღირებულებებს დაიცავს ქართველი და ევროპელი ხალხის ძალა.“- აღნიშნა მაჭარაშვილმა.