მამუკა მდინარაძე: 2024 წლის საპარლამენტო არჩევნები იქნება ბრძოლა, სადაც ჩვენ, ეროვნულ ხელისუფლებას, გლობალური ომის ძალების აგენტურა ცრუ ნარატივებით დაგვიპირისპირდება

16-07-2024

„ქართული ოცნების" აღმასრულებელი მდივანი, მამუკა მდინარაძე "ქართული ოცნების" საარჩევნო კამპანიისა და ახალი ცენტრალური ოფისის გახსნაზე სიტყვით გამოვიდა, რომელსაც უცვლელად გთავაზობთ:

"მოგესალმებით ქალბატონებო, მოგესალმებით ბატონებო,

მივესალმები მოწვეულ სტუმრებს, მივესალმები „ქართული ოცნების" თითოეულ წევრს, დაწყებული  ბატონი ბიძინა ივანიშვილით, ჩვენი საპატიო თავმჯდომარით და დამფუძნებლით, დამთავრებული თითოეულ ჯარისკაცამდე, „ქართული ოცნების" ჯარისკაცებს რომ უწოდებენ თავს - თითოეულ მათგანს მივესალმები.

მივესალმები ასევე ჩვენი მეგობრების ჯგუფს, შემართულ ჯგუფს, რომელსაც "ხალხის ძალა" ჰქვია და ეს მისალმებაც, მათ შორის, შემთხვევითი არ არის,  იმიტომ, რომ ჩემგან გაიგებთ ალბათ პირველად დღეს, გავკადნიერდები, რომ ისინი საპარლამენტო არჩვენებში ჩვენთან საერთო სიით მიიღებენ მონაწილოებას.

„ქართული ოცნების" 41 ათასზე მეტ წევრს ვულოცავ მათ ახალ ოფისს - ცოტა მეტია ციფრი, მაგრამ სხვა ციფრის მთქმელი მე დღეს არ ვარ, გამორიცხულია. გილოცავთ ახალი  ცენტრალური ოფისის გახსნას და მადლობას გადაგიხდით თითოეულ თქვენგანს იმისთვის, რაც ამ ქვეყნის სიყვარულით, მოყოლებული 2011 წლიდან, ბიძინა ივანიშვილის ხელმძღვანელობით გიკეთებიათ და მადლობა ასევე მომავლისთვის, როდესაც თქვენ კიდევ მეტი შემართებით დაიხარჯებით საკუთარი სამშობლოსთვის!

ყველა ხვდება, მეგობრებო, რომ წელს ჩვენ არ გვექნება ჩვეულებრივი არჩევნები, სადაც ჩვენი ოპონენტები, მაგალითად, თავის ხედვებზე ისაუბრებენ, რადგან მათ, როგორც მათვე თქვეს, არ აწყობთ, რომ შევიდნენ რომელიმე თემის შინაარსში.

ეს იქნება არჩევნები, სადაც ან სიკეთე, სიმართლე, პატრიოტიზმი, ეროვნული ძალა, ქართული იდენტობა და ტრადიციები, მშვიდობა, ღირსება, კეთილდღეობა, სიმართლე, ჭეშმარიტი ქრისტიანული, ევროპული გზა გაიმარჯვებს, ან... და მეორე ან აქ აღარ არსებობს, არ არსებობს მეორე ან, რადგან ამ ქვეყანას ფიზიკური და სულიერი განადგურება ნამდვილად არ უწერია! პირიქით, ჩვენ კიდევ უფრო გავძლიერდებით! ჩვენი ქვეყნის ისტორია არის ეს!

2024 წლის საპარლამენტო არჩევნები იქნება ბრძოლა, სადაც ჩვენ, დამოუკიდებელი - ხაზგასმით ვამბობ, დამოუკიდებელი ქვეყნის ეროვნულ ხელისუფლებას, გლობალური ომის ძალების აგენტურა  ცრუ ნარატივებით დაგვიპირისპირდება. ქართველმა ხალხმა უნდა შეძლოს, რომ „ნაცობა", როგორც აგენტურული, ბნელი და სისხლიანი იდეოლოგია, საბოლოოდ დამთავრდეს და გასამართლდეს.

დღეს საქართველოს და მისი ხელისუფლების უპირველესი ამოცანა გახდა ქვეყნის ფიზიკური და სულიერი გადარჩენა, მისი შემდგომი განვითარება და თავისუფლება ყოველგვარი სუბიექტური გავლენებისგან, რაც, არა მხოლოდ შეგვიძლია, არამედ, ვალდებულებიც ვართ ეს გავაკეთოთ. ამიტომ უნდა შევძლოთ იმგვარად გაძლიერება, რომ საქართველოს შესახებ გადაწყვეტილებები მხოლოდ ამ ქვეყანაში, საქართველოში მიიღებოდეს!

ერთია არსებული რეალობა და მეორეა საქართველოს წინააღმდეგ მომართული ცრუ კამპანია, თუმცა ჩვენ არ უნდა დავუშვათ, რომ, მაგალითად, ევროკავშირის ფაქტორი, ნაცვლად კეთილსინდისიერი მიზნებისა, ვინმემ შანტაჟის იარაღად გამოიყენოს საქართველოს წინააღმდეგ.

ჩვენ არასდროს მივატოვებთ ჩვენს ქვეყანას, ჩვენს სამშობლოს და ქართველ ხალხს. დარწმუნებულები ვართ, რომ ვერავინ მოატყუებს მათ და ქართველი ხალხიც ბოლომდე დაგვიდგება გვერდით ამ უთანასწორო ბრძოლაში, სადაც აუცილებლად გავიმარჯვებთ წელს, იმ არჩევნებზე, რომელსაც ასევე გადამწყვეტი მნიშვნელობა ექნება, როგორც 2012 წლის არჩევნებს.

აი, ეს არის ნამდვილი ერთობა და არა უბრალოდ სიტყვა, რომელიც ვიღაცებს სარწმუნოების ჩასანაცვლებლად ჭირდებათ.

ჩვენ ვივლით ქართულ გზაზე, სადაც თანაბარი შანსი და გარანტია ექნება ქვეყნის მშვიდობიან განვითარებას, დეოკუპაციას და ქვეყნის გამთლიანებას, რწმენის, ეროვნული იდენტობის და ტრადიციების შენარჩუნებას და ჩვენი ქვეყნის ღირსეულ წევრობას ევროპულ ოჯახში! და არც ერთი მათგანი რომელიმე მეორის ხარჯზე. ამიტომ, მხოლოდ მშვიდობით! მხოლოდ ღირსებით! მხოლოდ კეთილდღეობით! და მხოლოდ ევროპისკენ!" - განაცხადა მდინარაძემ.