ვლადიმერ ბოჟაძე ბიძინა ივანიშვილის მიმართ ტერორისტული აქტის შესაძლო მომზადებაზე: ასე ებრძვიან ყველას ვინც იცავს საკუთარი ქვეყნის და ხალხის ინტერესებს, ვისთვისაც მთავარი ღირებულება არის ღმერთი, სამშობლო, ოჯახი

23-07-2024

„ომის და ღალატის პარტია, მათი მართვადი მედიები და უფლებადამცველები უკვე 7 დღეა მალავენ ინფორმაციას, რომ მათი აქტივისტების მიმართ გამოძიება სავარაუდო ტერორისტული აქტის მომზადებაზე მიმდინარეობს“, - ასე ეხმიანება თბილისის საკრებულოს წევრი ვლადიმერ ბოჟაძე ტერორიზმისა და სახელმწიფო გადატრიალების საქმეზე გამოკითხული გელა კახაბრიშვილის ადვოკატის, მიხეილ რამიშვილის განცხადებას, რომლის თქმითაც, საქალაქო სასამართლოში გამოკითხვის დროს საუბარი იყო „ქართული ოცნების“ საპატიო თავმჯდომარის, ბიძინა ივანიშვილის მიმართ შესაძლო ტერორისტული აქტის მომზადებაზე.

ბოჟაძის თქმით, ასე ებრძვიან ყველას ვინც იცავს საკუთარი ქვეყნის და ხალხის ინტერესებს, ვისთვისაც მთავარი ღირებულება არის ღმერთი, სამშობლო, ოჯახი.

„როცა პრემიერ-მინისტრს ირაკლი კობახიძეს ირიბად დაემუქრნენ სიცოცხლის მოსპობით, მაშინ ოპოზიციამ ეს საკითხი ხუმრობის და ქილიკის საგნად აქცია. ოპოზიციისგან ეს არ გაგვიკვირდა, მაგრამ თურმე ამ ქილიკის ფონზე ბიძინა ივანიშვილის მიმართ ტერაქტს გეგმავდნენ, რადგან 2024 წლის არჩევნებში გარდაუვალი მარცხი ელოდებათ. ომის და ღალატის პარტია, მათი მართვადი მედიები და უფლებადამცველები უკვე 7 დღეა მალავენ ინფორმაციას, რომ მათი აქტივისტების მიმართ გამოძიება სავარაუდო ტერორისტული აქტის მომზადებაზე მიმდინარეობს. ესროლეს რობერტ ფიცოს, დაემუქრნენ ირაკლი კობახიძეს, ავარიას გადაურჩა ვიქტორ ორბანი, სასწაულებრივად გადაურჩა სიკვდილს დონალდ ტრამპი, ტერორისტულ აქტს გეგმავენ ბიძინა ივანაშვილის მიმართ, ასე ებრძვიან ყველას ვინც იცავს საკუთარი ქვეყნის და ხალხის ინტერესებს, ვისთვისაც მთავარი ღირებულება არის ღმერთი, სამშობლო, ოჯახი. ვერც სიცოცხლის მოსპობის მუქარით, ვერც ტერორისტული აქტის მომზადებით, მით უმეტეს ფაქტობრივი თუ მოსალოდნელი სანქციებით ვერავის შეაშინებენ, ჩვენი გუნდი, თუნდაც სიცოცხლის ფასად დავიცავთ ჩვენი ქვეყნის და ხალხის ინტერესებს, ჩვენს მამულს, ენას და სარწმუნოებას!"- წერს ბოჟაძე.