დავით ქართველიშვილი რომან გოცირიძის განცხადებაზე: 2022 წლის ივნისში ქართული მხარე უდანაშაულოდ ცნო ჰააგის საერთაშორისო სასამართლომ, აღნიშნული პროცესი ამჟამინდელმა ხელისუფლებამ და „ქართულმა ოცნებამ" მოიგო

15-08-2024

პარტია „ხალხის ძალის“ წევრი დავით ქართველიშვილი რომან გოცირიძის განცხადებას ეხმიანება, სადაც ოპოზიციონერი დეპუტატი ამბობს, რომ ჰააგის სასამართლო დავა არა „ქართულმა ოცნებამ“ , არამედ საქართველოს ხელისუფლებამ მოიგო.

სოციალურ ქსელში გამოქვეყნებულ პოსტში ანალიტიკოსი პარალელს ფეხბურთთან ავლებს და წერს: „დაახლოებით იმას ამბობს, რომ პორტუგალიისთვის არა ქართველ ფეხბურთელებს, არამედ საქართველოს ნაკრებს მოუგია - ოღონდ იმ პერიოდში, გუნდის მთავარი მწვრთნელი სააკაშვილი რომ იყოო“.

დავით ქართველიშვილი აღნიშნავს, რომ რომან გოცირიძე ცრუობს და განმარტავს, რომ ჰააგის სასამართლოს პროკურორმა მოსამართლეთა კოლეგიას დანაშაულის გამოძიების მიზნით არა 2008 წელს, არამედ 2015 წელს მიმართა, 2016 წელს კი მიმართვა დაკმაყოფილდა. როგორც ექსპერტი აღნიშნავს, ქართული მხარე 2022 წლის ივნისში ცნეს უდანაშაულოდ, იმდროინდელ სამ მაღალჩინოსანზე კი, ჰააგის სასამართლომ დაპატიმრების ორდერი გასცა.

დავით ქართველიშვილის თქმით, სწორედ ამ თარიღებზე დაყრდნობით, ჰააგის სასამართლოში მიღწეული წარმატება „ქართული ოცნებისა“ და ამჟამინდელი მთავრობის დამსახურებაა.

„ანუ, დაახლოებით იმას ამბობს, რომ პორტუგალიისთვის არა ქართველ ფეხბურთელებს, არამედ საქართველოს ნაკრებს მოუგია - ოღონდ იმ პერიოდში, გუნდის მთავარი მწვრთნელი სააკაშვილი რომ იყოო. აქ კი, ტრადიციულად, ცრუობს.

ჰააგის საერთაშორისო სასამართლოს პროკურორმა მოსამართლეთა კოლეგიას შესაძლო სამხედრო დანაშაულების ჩადენის გამოძიების მიზნით (როგორც საქართველოს, ასევე ე.წ. სამხრეთ ოსეთის მხრიდან), თანხმობის მისაღებად მიმართა 2015 და არა 2008 წელს, რაც დაკმაყოფილდა კიდეც, 2016 წლის იანვარს.

2022 წლის ივნისში, დასრულებული გამოძიების შედეგად, ქართული მხარე უდანაშაულოდ ცნო ჰააგის საერთაშორისო სასამართლომ, ხოლო იმდროინდელ სამ ჩინოსანზე ე.წ. სამხრეთ ოსეთიდან, დაპატიმრების ორდერი გასცა. ასე რომ, აღნიშნული პროცესი, დიახ, ამჟამინდელმა ხელისუფლებამ და „ქართულმა ოცნებამ“ მოიგო,“ - წერს ქართველიშვილი სოციალურ ქსელში.