25-10-2018
ხაშურში საქველმოქმედო აქცია „დავეხმაროთ ლეიკემიით დაავადებულ ბავშვებს“ გაიმართა.
როგორც „ინტერპრესნიუსს“ ხაშურის მუნიციპალიტეტიდან აცნობეს, აქციის ინიციატორები მესამე საჯარო სკოლის მესამეკლასელები და მათი პედაგოგი ხათუნა ნოზაძე, ასევე ბენდ ,,SPAM JAM"-ის მუსიკოსები იყვნენ.
აქციის ფარგლებში ბავშვებმა ქალაქის ქუჩებში მსვლელობა გამართეს, რა დროსაც გამვლელებს შემოდგომის ნობათს სთავაზობდნენ და ყულაბებში ლეიკემიით დაავადებული ბავშვების დასახმარებლად შემოწირულობას აგროვებდნენ.
მოსწავლეები ხაშურის მუნიციპალიტეტსაც ესტუმრნენ. მუნიციპალიტეტის მერიისა და საკრებულოს წარმომადგენლებმა საკუთარი წვლილი შეიტანეს ლეიკემიით დაავადებული ბავშვების დასახმარებლად.
აქციის ფარგლებში შეგროვებული თანხა დიმიტრი ცინცაძის სახელობის ფონდს გადაეცა.