რადიკალური ოპოზიციის ექსპერტი საკონსტიტუციო სასამართლოში ტყუილში გამოიჭირეს

31-08-2024

“ჩვენ გვინდა, საზოგადოებას დავანახოთ, ვისთან გვაქვს შეხება და ეს ადამიანი, რამდენად შესაძლებელია ობიექტურ დასკვნას აკეთებდეს”, – ამის შესახებ საკონსტიტუციო სასამართლოში, „გამჭვირვალობის კანონის“ წინააღმდეგ სარჩელის განხილვაზე პარლამენტის წარმომადგენელმა, ქრისტინე კუპრავამ მოსარჩელე მხარის მიერ მიწვეული ენათმეცნიერის, მარინა ბერიძის შესახებ განაცხადა.

მან ბერიძეს ჰკითხა, თუ გამოუყენებია სიტყვები „ღალატი“, „მოღალატე“ და რა შემთხვევაში იყენებს აღნიშნულ ტერმინებს. აღნიშნულ კითხვაზე, ენათმეცნიერმა უპასუხა: „საბედნიეროდ ეს სიტყვები არ გამომიყენებია“. ამ პასუხის შემდეგ, ქრისტინე კუპრავამ წაიკითხა მარინა ბერიძის მოსაზრებები, რომლებიც მას საჯაროდ აქვს გამოქვეყნებული.

„შევეცადეთ და შეკითხვები დავუსვით, გამოუყენებია თუ არა სიტყვები: მოღალატე, ღალატი და მინდა სასამართლოს, და არა მხოლოდ სასამართლოს, საზოგადოებას ამოვუკითხო ქალბატონი მარინას მოსაზრებები, რომელიც საჯაროდ გამოქვეყენებულა და ამბობს: „რუსეთის პოლიტიკურ ორბიტაზე დაბრუნების საფრთხის წინ, “მაგრამ” და “თუმცა” არ იწერება და ყველა ტექსტი ამ ყველა წესით შერულებული, შეიძლება ჩანაცვლდეს სიტყვით “ღალატი” და ყველა ასეთი ტექსტის ავტორის მეტსახელია “მოღალატე”. მეტიც, ის ამბობს, რომ: „როგორ გვყვარებია თურმე ეს 84 და როგორ გვდომებია მათი გადარჩენა. მოღალატეთა და უცხო ქვეყნის გავლენის გამტარებელი რეესტრი თავად შექმნეს.“ – თქვენთვის უცხოა ეს სიტყვები ქალბატონო მარინა, თქვენ არ გეკუთვნით ეს სიტყვები, ქალბატონომ, მარინა? ჩვენ გვინდა, რომ საზოგადოებას დავანახოთ, ვისთან გვაქვს შეხება და ეს ადამიანი, რამდენად შესაძლებელია ობიექტურ დასკვნას აკეთებდეს.“ – განაცხადა ქრისტინე კუპრავამ.