სამართლიანად ჩატარდა თუ არა არჩევნები
მამუკა მდინარაძე: „ნაციონალურმა მოძრაობამ“ დაიწყო ნეგატიური კამპანია, ყველა დამკვირვებელს ვთხოვ, კარგად დააფიქსირონ და ანგარიშები რომ გამოქვეყნდება, არავის დაავიწყდეს ანგარიშში იმის შეტანა, რა ფორმით დაიწყო ამის კეთება „ნაციონალურმა მოძრაობამ“
3-09-2024
„არსებობს ასეთი ლეგენდა „ნაცმოძრაობის“ შესახებ, რომ ისინი პიარში მაგრები არიან და პირველი ზიზღის კამპანია და ანტირეკლამა დაიწყეს იმით, რომ საკუთარი ბანერის, „ნაცმოძრაობის“ ისარი მიმართეს წარსულისკენ, მარცხენა მხარეს და მარჯვნივ - „ქართული ოცნების". ეს სწორი მიდგომა იყო, ქვეცნობიერმა თავისი ქნა“, - ამის შესახებ „ქართული ოცნების“ აღმასრულებელმა მდივანმა და საპარლამენტო უმრავლესობის ლიდერმა, მამუკა მდინარაძემ, განაცხადა.
მისი თქმით, „ნაციონალურმა მოძრაობამ“ იმდენიც ვერ მოიფიქრა, რომ საკუთარი პარტიის ისარი მომავლისკენ მიემართა.
მდინარაძემ ხაზი გაუსვა იმასაც, რომ მმართველ პარტიას არც ერთი მსგავსი სახის ბანერი არ დაუმზადებია, შესაბამისად, ის სთხოვს ყველა დამკვირვებელს,
ანგარიშებში აისახოს "ნაციონალური მოძრაობის" მიერ "ქართულ ოცნებას" წინააღმდეგ წარმოებული ზიზღის კამპანიის ფორმები.
„პირველ ვერსიაში, იმდენიც კი ვერ მოიფიქრეს, რომ წარსულისკენ არ მიემართათ თავისი პარტიის ისარი და ჩვენი მომავლისკენ. ჩვენი დისკრედიტაცია უნდოდათ და მომავლისკენ გაიშვირეს ჩვენი ისარი - ეს ქვეცნობიერის გამოძახილი იყო. ახლა ვიღაცამ ურჩია ეტყობა, ან როზნერმა, ან მესინა ჯგუფმა და შეატრიალეს, მაგრამ, შეტრიალება სიმართლეს არ ცვლის. უნდა დავაფიქსიროთ ისიც, რომ ჩვენ არც ერთი მსგავსი ბანერი არ გაგვიკეთებია, მათ დაიწყეს ნეგატიური კამპანია. სიცრუე გასაგებია. სულ სიცრუე იქნება, იყო, არის და იქნება მათი კამპანიის მთავარი ღერძი და საფუძველი, მაგრამ, დაიწყეს ნეგატიური კამპანია "ქართული ოცნების" წინააღმდეგ. ვთხოვ ყველა ობიექტურ - ბრჭყალებში თუ მის გარეშე ობიექტურ დამკვირვებელს, რომ დააფიქსირონ რა, როდის, რა რიცხვში დაიწყო "ნაციონალურმა მოძრაობამ". არც ერთი ნეგატიური ბანერი ჩვენ არ დაგვიმზადებია და მათ ასეთი კამპანია დაიწყეს და ყველა დამკვირვებელს ვთხოვ ხაზგასმით, რომ ეს კარგად დააფიქსირონ. ანგარიშები რომ გამოქვეყნდება, არავის დაავიწყდეს ანგარიშში იმის შეტანა, როდის და რა ფორმით დაიწყო ამის კეთება "ნაციონალურმა მოძრაობამ“, - განაცხადა მამუკა მდინარაძემ.
