მამუკა მდინარაძე „ლელოს“ და გახარიას პარტიის შესაძლო გაერთიანებაზე: როგორი უღირსობა უნდა დაგავალონ, რომ დაგიძახოს შემდეგ პრეზიდენტად წოდებულმა, ერთმანეთს თვალთხარიას და მოღალატეს რომ ეძახდით და გაგაერთიანონ - გულწრფელად მეცოდებიან

17-09-2024

როგორი უღირსობა უნდა დაგავალონ, რომ დაგიძახოს შემდეგ პრეზიდენტად წოდებულმა, ერთმანეთს თვალთხარიას და მოღალატეს რომ ეძახდით და გაგაერთიანონ - გულწრფელად მეცოდებიან, - ამის შესახებ „ქართული ოცნების“ აღმასრულებელმა მდივანმა, მამუკა მდინარაძემ უმრავლესობის სხდომის შემდეგ გამართულ ბრიფინგზე ჟურნალისტებთან განაცხადა, რითაც პრეზიდენტის მიერ „ძლიერ საქართველოსა“ და გიორგი გახარიას პარტიას მოლაპარაკებებისთვის ორბელიანების სასახლეში მიწვევას გამოეხმაურა.

მისივე თქმით, გახარიას შანსი არ ჰქონდა ბარიერის გადალახვის, ხაზარაძე ეპოტინებოდა ბარიერს და იმისთვის, რომ გარანტია მისცენ, ახლა ეძახიან და ავალებენ, რომ გაერთიანდნენ.

„რაში გამოიხატება ღირსება? რა ღირსებაზე ვლაპარაკობთ? რა სიტყვებით ლანძღავდნენ ერთმანეთს ეტყვიან და გაერთიანდებიან. „ენჯეოსაც“ ეტყვის თავისი პატრონი და შეიმჩნევს, თუ არა ეტყვიან და ვერ შეიმჩნევს, ვერც ჯუმბერ იზორიაზე თავდასხმას, ვერც პოლარიზაციას თვითონ რომ უზრუნველყოფენ და მერე რომ თვითონვე აღნიშნავენ. ადამიანი სიტყვით მოაკვლევინა მათმა პროპაგანდამ“, - განაცხადა მამუკა მდინარაძემ. მდინარაძის თქმით, „ლელოს“ და „გახარია საქართველოს“ გაერთიანებას სალომე ზურაბიშვილს არავინ ეკითხება.

„მახსოვს გახარიას გამონათქვამი: „ლელო განაცებას უნდა გადავარჩინო“ . „ლელო“ "განაცდა" მანამ, სანამ „ლელო“ იქნებოდა. „ლელო“ არ ერქვა "განაცებული" რომ იყო. ხაზარაძე „ნაციონალური მოძრაობის“ პარტნიორი იყო „ნაცების“ მმართველობის პერიოდიდან, მათ რეკეტს ხაზარაძე ხელმძღვანელობდა.

რა „ლელო განაცებას უნდა გადავარჩინო“ , რეებს იგონებ? - „ნაცებს“ ლანძღვას და კოალიცია ოთხგან აქვს დალაგებული. ახლა „ნაცების“ კლასტერს უერთდება, მხოლოდ იმიტომ, რომ დაავალეს. ასე დაავალებენ გვარამიასაც და დიდი შანსია, რომ „ნაცებს“ გაუერთიანდეს.

ორი პოლიტიკური პარტია იყო, რომლებიც ბარიერს ეპოტინებოდნენ: ერთია გვარამიას პარტია, მეორე გახარიას პარტია, შესაბამისად, ახლა ცდილობენ, რომ ისინი გაუერთიანონ სხვებს. ერთი გახარიასთან დააწყვილონ, მეორე „ნაციონალურ მოძრაობასთან“ იმისათვის, რომ ცოტა მაინც წინ წაიწიოს მათმა რეიტინგმა.

ერთ რამეს ვერ ხვდებიან, რომ მანდ მოკლე ჩართვა ხდება ხოლმე. გახარიას და „ლელოს“ ამომრჩეველი სხვადასხვაა და მათ ჰგონიათ, რომ მათი 2 და ამათი 4 პროცენტი არის 6-7-8, სინამდვილეში, შეიძლება ერთმანეთის რეიტინგი შეჭამოს. როგორც ისინი ჭამდნენ ბანკებიდან ხალხის ფულს, ასე იჭმევა პოლიტიკური რეიტინგი, ხაზარაძემ გაითვალისწინოს“, - განაცხადა მდინარაძემ.