განსაკუთრებით დიდი ოდენობით ნარკოტიკების შეძენა-შენახვისთვის ბრალდებულს ბათუმის სასამართლომ 10 წლით პატიმრობა მიუსაჯა

31-10-2018

ბათუმის საქალაქო სასამართლომ ბრალდების მხარის მიერ წარდგენილი მტკიცებულებები გაიზიარა და დიდი ოდენობით ნარკოტიკული საშუალების და წინასწარი შეთანხმებით ჯგუფურად განსაკუთრებით დიდი ოდენობით ნარკოტიკული საშუალების უკანონოდ შეძენა-შენახვისთვის ბრალდებული ი.მ. დამნაშავედ ცნო.

პროკურატურის ინფორმაციით, სასამართლო პროცესზე გამოკვლეული მტკიცებულებებით დადგინდა, რომ ი.მ.-მ უკანონოდ შეიძინა და ინახავდა დიდი ოდენობით - 0,01522 გრ. ნარკოტიკულ საშუალება ბუპრენორფინს. ასევე მან სხვა პირთან ერთად უკანონოდ შეიძინა და ინახავდა განსაკუთრებით დიდი ოდენობით - 2,115058 გრ. ნარკოტიკულ საშუალება ბუპრენორფინს. სამართალდამცველებმა აღნიშნული ნარკოტიკული ნივთიერებები ქ.ბათუმში ამოიღეს.

ი.მ. 2018 წლის 20 თებერვალს ქ.ბათუმში დააკავეს.

მას ბრალდება საქართველოს სისხლის სამართლის კოდექსის 260-მუხლის მე-3 ნაწილის „ა“ და ‘’ბ’’ ქვეპუნქტით და მე-6 ნაწილის ‘’ა პუქნტით (დიდი ოდენობით ნარკოტიკული საშუალების შეძენა - შენახვა და წინასწარი შეთანხმებით ჯგუფურად განსაკუთრებით დიდი ოდენობით ნარკოტიკული საშუალების უკანონო შეძენა-შენახვა) წარედგინა. მას აღკვეთის ღონისძიების სახით პატიმრობა შეეფარდა.

ბათუმის საქალაქო სასამართლომ ი.მ. დამნაშავედ ცნო წარდგენილ ბრალდებაში და სასჯელის სახედ და ზომად 10 წლით თავისუფლების აღკვეთა განუსაზღვრა.