სამართლიანად ჩატარდა თუ არა არჩევნები
ლევან ნიკოლეიშვილი ეუთო/ოდირის მისიის განცხადებაზე: მთავარი არათუ ითქვა, არამედ ხაზი გაესვა, რომ გუშინ არჩეული იქნა ხელისუფლება, არჩევნები შედგა, ცესკოს შედეგები ლეგიტიმურია
27-10-2024
„ერთიანი ნეიტრალური საქართველოს" წევრი, ლევან ნიკოლეიშვილი, ეუთო/ოდირის სადამკვირვებლო მისიის პრესკონფერენციას სოციალურ ქსელში ეხმიანება და აცხადებს, რომ მათ პირდაპირ გამოთქვეს იმედი გუშინ არჩეული ხელმძღვანელობის მიერ ქვეყანაში არსებული გამოწვევების ეფექტიანად გამკლავებასთან დაკავშირებით.
ნიკოლეიშვილის შეფასებით, ამ განცხადებით პირდაპირ ითქვა, რომ ცესკოს შედეგები ლეგიტიმურია და გუშინ საქართველოს ხელისუფლება იქნა არჩეული.
„ეუთო/ოდირის სადამკვირვებლო მისიამ პირდაპირ განაცხადა შემდეგი: „მინდა გულწრფელი იმედი გამოვხატო, რომ გუშინ არჩეული ხელმძღვანელობა ეფექტიანად გაუმკლავდება ძირითად გამოწვევებს, რომელიც ამ ქვეყნის წინაშე დგას და იმედი გვაქვს, რომ საქართველოს უფრო ახლოს მიიყვანენ იმ მიზნებთან, რაც უკავშირდება ევროკავშირში გაწევრიანებას.“ ახლა გინდა ასე თქვით და გინდა ისე მაგრამ, მთავარი არათუ ითქვა არამედ ხაზი გაესვა, რომ გუშინ არჩეული იქნა ხელისუფლება, არჩევნები შედგა, ცესკოს შედეგები ლეგიტიმურია. რაც შეეხება მათ რეკომენდაციას, რა თქმა უნდა ხელისუფლება არათუ გაუმკლავდება გამოწვევებს არამედ ეფექტიან გააგრძელებს ქვეყნის მშენებლობას, მიუხედავად იმისა რომ მარგინალი ოპოზიცია, მხოლოდ პროცესების დაზიანებას შეეცდება," - წერს ნიკოლეიშვილი Facebook-ზე.
