სამართლიანად ჩატარდა თუ არა არჩევნები
რიკარდ იოზვიაკი: საბოლოო ჯამში, ევროკავშირს მოუწევს ურთიერთობა „ქართული ოცნების“ მთავრობასთან, რადგან ისინი არიან ერთადერთი რეალური მოთამაშე და ევროკავშირს დიდი არჩევანი არ აქვს
19-11-2024
„საბოლოო ჯამში, ევროკავშირს მოუწევს (ალბათ უხალისოდ) „ქართული ოცნების“ მთავრობასთან ურთიერთობა“, - ამის შესახებ „რადიო თავისუფლების“ ევროპის ბიუროს რედაქტორი, რიკარდ იოზვიაკი, წერს. როგორც იოზვიაკი აღნიშნავს, მას ჰქონდა საუბარი ევროკავშირის ოფიციალურ პირებთან, რომლებმაც დაადასტურეს, რომ არ აქვთ დიდი არჩევანი, ვინაიდან „ქართული ოცნება“ ერთადერთია ქართულ პოლიტიკურ მოედანზე არსებულ ძალებს შორის.
„ევროკავშირის ოფიციალური პირების თქმით, რომლებსაც ვესაუბრე, ნამდვილად არსებობს აზრი, რომ ისინი [„ქართული ოცნება“] ერთადერთი რეალური მოთამაშეები არიან მოედანზე, ამიტომ, ევროკავშირს ნამდვილად არ აქვს დიდი არჩევანი. ევროკავშირის ლიდერებს ევროპის პოლიტიკური გაერთიანების (EPC) სამიტის მეორე დღეს სიღრმისეულად უნდა განეხილათ საქართველოს საკითხი, მაგრამ აშშ-ის პრეზიდენტად დონალდ ტრამპის ხელახალი არჩევა და ევროპის ცენტრალური ბანკის ყოფილი პრეზიდენტის მარიო დრაგის პრეზენტაცია ბლოკის კონკურენტუნარიანობის შესახებ დომინირებდა. იმ დღეს საქართველო მხოლოდ ესტონეთისა და ლიტვის ლიდერებმა ახსენეს.“ - წერს იოზვიაკი.
მისი განცხადებით, იყო სხვა ნიშნებიც, რომ საქართველოს საკითხმა უკან გადაინაცვლა, მაგალითად, ევროკავშირის საგარეო პოლიტიკის ახალ ხელმძღვანელს, კაია კალასს, საქართველო საერთოდ არ უხსენებია.
„იყო სხვა ნიშნებიც, რომ საკითხი უკვე უკანა პლანზეა გადაწეული. ევროპარლამენტში ევროკავშირის საგარეო პოლიტიკის ახალი ხელმძღვანელის, კაია კალასის მოსმენისას, საქართველო სამსაათიანი გამოსვლის დროს საერთოდ არ იყო ნახსენები. ევროკავშირის გაფართოების საკითხებში ახალმა კომისარმა, მარტა კოსმა ასევე არ ახსენა საქართველო მისი მოსმენის შესავალ სიტყვაში, მაგრამ ევროპარლამენტარის კითხვის შემდეგ მან თქვა, რომ საქართველოს ევროკავშირში გაწევრიანების პროცესი, რომელიც შეჩერებულია, შეიძლება განახლდეს, თუ მთავრობა გააუქმებს ახლახან მიღებულ და საკამათო „უცხოელი აგენტების“ კანონს და „ანტი-ლგბტ კანონს“, - წერს რიკარდ იოზვიაკი.
