საქართველოს ეროვნული ბანკის მიერ რეგისტრირებული საგადახდო მომსახურების პროვაიდერი შპს „მანი მუვერსი“ კიდევ ერთი არასაბანკო ინსტიტუტია საქართველოში, რომელმაც სებ-ისგან ღია ბანკინგში ჩართვასთან დაკავშირებით შესაბამისი თანხმობა მიიღო.

ეროვნული ბანკის ინფორმაციით, აღნიშნულის ფარგლებში, შპს „მანი მუვერსი“ მომხმარებლებს ღია ბანკინგის API-ების გამოყენებით ინოვაციურ, უსაფრთხო და მათ საჭიროებებზე მორგებულ ფინანსურ მომსახურებებს და პროდუქტებს შესთავაზებს. სერვისი მოიცავს როგორც ანგარიშის ინფორმაციის წვდომის, ასევე, გადახდის ინიცირების მომსახურებას. ამასთან, შესაძლებლობას მისცემს შპს „მანი მუვერს“ საკუთარ მომხმარებლებს მათზე მორგებული მომსახურებები შესთავაზოს.

როგორც სებში აღნიშნავენ, ეს სიახლე ხელს შეუწყობს კომერციული ბანკების მიერ გამოქვეყნებული გადახდის ინიცირების ღია API-ების მუშაობის გამართული და ეფექტური ფუნქციონირების მონიტორინგს. შპს „მანი მუვერსის“, როგორც მესამე მხარის პროვაიდერის (TPP - Third Party Provider) ჩართულობა გააძლიერებს და უზრუნველყოფს ფინანსური სერვისების ფართოდ დანერგვას, რაც, ასევე, დაეხმარება მომხმარებლებს მიიღონ უფრო მარტივი და კომფორტული/მოქნილი მომსახურება.

„ახალი ტექნოლოგიების ხელშესაწყობად და ფინტექის ეკოსისტემის განვითარების მიზნით, ეროვნულმა ბანკმა არაერთი წარმატებული ნაბიჯი გადადგა. მათ შორის არის ღია ბანკინგი, რომელსაც დადებითი შედეგების მოტანა შეუძლია როგორც მომხმარებლებისთვის, ისე მთელი საფინანსო სექტორისთვის. კიდევ ერთი არასაბანკო ინსტიტუტის ჩართვა მნიშვნელოვანი ეტაპია, როგორც ღია ბანკინგის, ისე ფინტექ სექტორის განვითარების პროცესში. ღია ბანკინგი ფინტექ კომპანიებს საშუალებას აძლევს განავითარონ მათი ინოვაციური მიდგომები და მომხმარებლებზე ორიენტირებული სერვისები. ღია ბანკინგის პოტენციალის სრულად რეალიზება წარმოშობს ინოვაციურ სერვისებს/პროდუქტებს, რაც გააუმჯობესებს ფინანსური მომსახურების ხარისხს, გაზრდის კონკურენციას, დაამკვიდრებს ახალ სტანდარტებს.

შედეგად, საბოლოოდ მომხმარებელი მიიღებს ისეთ პერსონალიზებულ ფინანსურ სერვისებს/პროდუქტებს, რომლებიც შექმნილია მათი საჭიროებების გათვალისწინებით“, - განაცხადა ფინანსური და საზედამხედველო ტექნოლოგიების დეპარტამენტის უფროსმა ვარლამ ებანოიძემ.

შეგახსენებთ, რომ ღია ბანკინგი ელექტრონული ტექნოლოგიების გამოყენებით სხვადასხვა საფინანსო ორგანიზაციას შორის, მომხმარებლის ინიციატივით, ფინანსურ ინსტიტუტებში არსებული ინფორმაციის დაუყოვნებლივ გაცვლას გულისხმობს.