GITA - სა და საქართველოს ანგელოზი ინვესტორების ქსელის აქსელის ორგანიზებით, Startup Investment Forum ZUGDIDI გაიმართება

26-11-2024

საქართველოს ინოვაციების და ტექნოლოგიების სააგენტოს ზუგდიდის ტექნოპარკის ინიციატივითა და აქსელის - საქართველოს ანგელოზი ინვესტორების ქსელის ორგანიზებით, 6-8 დეკემბერს ზუგდიდი პირველად უმასპინძლებს Startup Investment Forum-ს. ფორუმის მიზანია სამეგრელო - ზემო სვანეთის რეგიონის სტარტაპ ეკოსისტემის განვითარების ხელშეწყობა, კერძო სექტორის ჩართულობის გაზრდა, ადგილობრივი ინოვაციური პროექტების მხარდაჭერა და მათთვის ღირებული ცოდნის გაზიარება.

საქართველოს ინოვაციების და ტექნოლოგიების სააგენტოს ინფორმაციით, ღონისძიება 3 დღის განმავლობაში გააერთიანებს თბილისისა და სამეგრელო - ზემო სვანეთის რეგიონის სტარტაპ ეკოსისტემის წევრებს, მათ შორის ანგელოზ ინვესტორებს, აქსელის პორტფოლიო ტექნოლოგიური სტარტაპების დამფუძნებლებს, დამწყებ მეწარმეებს, პოტენციურ ანგელოზ ინვესტორებსა და სფეროთი დაინტერესებულ კერძო, თუ საჯარო სექტორის წარმომადგენლებს.

ღონისძიების მთავარი ნაწილი გაიმართება 7 დეკემბერს, 12:00 საათზე, ზუგდიდში, ნიკოსეულ სასახლეში. აქსელის წევრები, მოწვეული სტუმრები და პორტფოლიო სტარტაპები თავიანთ გამოცდილებას გაუზიარებენ დამწყებ მეწარმეებს, გაიმართება ადგილობრივი სტარტაპების ფიჩები, პანელური დისკუსები და პარტნიორების პრეზენტაციები.

სამდღიანი ვიზიტის ფარგლებში, აქსელი დააორგანიზებს ვიზიტს კანიონზე, მოაწყობს სპეციალურ ვახშამსაც, სადაც ანგელოზი ინვესტორები და სტარტაპების დამფუძნებლები არაფორმალურ გარემოში შეძლებენ ღირებული კონტაქტების დამყარებას.

ფორუმს მხარს უჭერენ: ტექნოპარკი ზუგდიდი, ქალაქ ზუგდიდის მერია, Socar Georgia, GEC Consulting, Kudos Georgia, Arci და სხვა.

7 დეკემბრის კონფერენციაზე დასასწრებად, დარეგისტრირდით ბმულზე: https://apps.mygita.ge/zs/RzDHqC