სამართლიანად ჩატარდა თუ არა არჩევნები
"მამამ თავი უნდა მოიკლას, მაშინ სახლიდან არ გაგვყრიან..." - 10 წლის ფოთელი ბიჭი დახმარებას ითხოვს
9-11-2018
"ფეისბუქში" ვრცელდება 10 წლის ფოთელი ბიჭის, გრიგოლ ესებუას ემოციური წერილი. სკოლის მოსწავლე დახმარებას ითხოვს იმისთვის, რომ მისი ოჯახი ბანკის ვალების გამო ქუჩაში არ დარჩეს. პატარა ბიჭის პრობლემა უამრავმა ადამიანმა მიიტანა გულთან - პოსტს ათასობით გაზიარება აქვს, ბევრი გამოთქვამს 10 წლის ბავშვის და მისი ოჯახის დახმარების სურვილს.
"მე ვარ გრიგოლ ესებუა 10 წლის, ვცხოვრობ საქართველოში, ქალაქ ფოთში თამარ მეფის 71 ნომერში. მამა ბადრი (ბაჩუკი) ესებუა 62 წლის, დედა 57 წლის (დიასახლისი). მამა მუშაობს დროებითი ხელშეკრულებით ფოთის ნავსადგურში 2018 წლის მაისიდან, მანამ აქვე მუშაობდა, მხოლოდ მუდმივ შტატში უფრო მაღალი ხელფასით. მამამ 2013 წელს "ვითიბი ბანკიდან" გამოიტანა იპოთეკური სესხი 19 500 დოლარი, როცა დოლარი 1,65 ლარი ღირდა (სესხი 10-წლიანია დასაბრუნებელია 36 000 დოლარი) თავი ფული დარჩენილი აქვს 16 900 დოლარი.
მამა ყოველთვე იხდიდა 292 დოლარს, მამას აგრეთვე "ტაო პრივატ ბანკის" 35 000 ლარი ჰქონდა ვალი. დოლარის კურსის მატებისა და მამას ხელფასის შემცირების გამო, ვალის გადახდა ფიზიკურად ვერ შეძლო. მას ფული მხოლოდ ვითიბი ბანკისთვის ყოფნიდა. 2018 წელს მამას ხელფასი საქართველოს ბანკმა დაუყადაღა 2019 წლის ივნისამდე. ხელფასის ნაწილი საქართველოს ბანკს მიაქვს 641 ლარი, ხოლო ვითიბი ბანკს 513 ლარი. საუბედუროდ ეს თანხა ვითიბი ბანკს არ ყოფნის, არსებობაზე ლაპარაკი ზედმეტია.
მინდა მივმართო საქართველოს ბანკის მმართველს არ გრცხვენიათ ქუჩაში რომ მტოვებთ, მამას ამდენ პროცენტს ახდევინებთ, მაშიმშილებთ. როგორ აზიდავთ ცოდვას უფალთან, რას ეტყვით ყველაზე დიდ მსაჯულს, ვითიბი ბანკში 18 000$ გადახდილი აქვს, მაგრამ ორჯერ რეორგანიზაციის გამო ეს თანხა არ ეთვლება. ახლა ყადაღის გამო ვერ გადაიხადა და დაგროვდა 570 $, თუ ამ თანხას ორ კვირაში არ გადავიხდით სახლიდან გაძევება გვემუქრება.
მე წასასვლელი არსად მაქვს... სად ვიცხოვრო, როგორ ვიარსებო, რა უნდა ქნას ჩემმა ასაკოვანმა მშობლებმა? მე-5 საჯარო სკოლის მოსწავლე ვარ, კარგად ვსწავლობ, მინდა ასე ბეჯითი მოსწავლე ვიყო მაგრამ სად ქუჩაში? გამოსავალი ერთია - მამამ თავი უნდა მოიკლას, მაშინ სახლიდან არ გაგვყრიან... მე, გრიგოლ ესებუა კეთილ ადამიანებს გთხოვთ, გევედრებით დამეხმაროთ თანხა (თვიური გადასახადი 292$) ივნისის თვემდე. მე სწავლას გავაგრძელებ, გავიზრდები ღირსეული ადამიანი და თქვენს ვალს აუცილებლად დაგიბრუნებთ! ოღონდ ახლა არ გამწიროთ ქუჩისთვის. გთხოვთ..." - ვკითხულობთ წერილში, "ფეისბუქზე" ნინო ქვარცხავამ გამოაქვეყნდა.
როგორც ქვარცხავამ Ambebi.ge-სთან საუბარში აღნიშნა, გრიგოლი მასთან ფურცლით ხელში მივიდა და ტექსტის სოციალურ ქსელში განთავსება სთხოვა. მისი თქმით, ესებუების ოჯახს ბანკთან ვალდებულება აქვს და მათი უსახლ-კაროდ დარჩენის საშიშროება არსებობს.
"ბავშვი მოვიდა, მომიტანა ნაწერი და მომიყვა თავისი ცხოვრება, თუ როგორი დაძაბულობაა ოჯახში, როგორ კამათობენ მშობლები სახლის გამო, საიდანაც ბანკში თანხის გადაუხდელობის გამო გამოძევება ემუქრებათ. ასევე მითხრა, რომ მამა თავის მოკვლას აპირებსო. ამ ბავშვს არც "ფეისბუქი" აქვს, არც ინტერნეტი და არც კომპიუტერი. რა თქმა უნდა ყველა მოზარდის გვერდზე ვარ მეც, რადგან თავად დედა ვარ. ამ ბავშვის სატკივარი გულთან მივიტანე და ყველა ქართველს ვთხოვე, თუნდაც ერთი ლარი მისთვის გაეღოთ. მართალია გრიგოლის მამა მუშაობს, მაგრამ მისი ხელფასი ბანკის გადასახადებს არ ყოფნის. მხარი დავუჭირე, რადგან ეს რეალობა იყო. ჩემი არც ნათესავია, არც ბიძაშვილია და არც მამიდაშვილი, უბრალოდ საუკეთესო მეზობელია" - აღნიშნა ნინო ქვარცხავამ.
ჩვენ გრიგოლის კლასის დამრიგებელს ეკა გაბუნიასაც ვესაუბრეთ. პედაგოგის თქმით, ესებუების ოჯახს ნამდვილად აქვს ფინანსური პრობლემები, რასაც ბავშვი ძალიან განიცდის და მშობლების დახმარებას ცდილობს:
"გრიგოლი მოწესრიგებულია, ძალიან კარგი მოსწავლე, პასუხსმგებლიანი. მშობელი აქტიურად არის ჩართული მეცადინეობის პროცესში, აკონტროლებს ყველაფერს, ხშირად მოდის სკოლაში და კითხულობს შვილის მდგომარეობას. მათი სოციალური მდგომარეობის შესახებ გრიგოლის წინა დამრიგებლისგან ვიცი. მასაც ერთხელ უთქვამს ჩემთვის, რომ ბანკის სესხები აქვთ და დახმარების იმედად არის დარჩენილი.
გრიგოლის კლასელების მშობლებისგანაც ვიცი, რომ პრობლემები აქვთ, ბავშვის მამაც სამსახურიდან წლების წინ დაითხოვეს. ეს ბავშვი უცხო ენაში ემზადებოდა, მაგრამ როგორც თავად მშობელმა მითხრა, ფინანსური პრობლემის გამო მიატოვებინა... თუ რა სახის მატერიალური პრობლემა ჰქონდა, ჩვენ მშობელთან ამაზე არ გვისაუბრია..." - აცხადებს გვეუბნება გრიგოლ ესებუას კლასის დამრიგებელი.
დახმარების მსურველებს შეგიძლიათ დაუკავშირდეთ ესებუას ოჯახს ტელეფონის ნომერზე 595 96 56 95
ან ჩარიცხოთ თანხა VTB ბანკის ანგარიშის ნომერზე: GE58VT0600000958743601 (ბადრი ესებუა)
