სამართლიანად ჩატარდა თუ არა არჩევნები
დუგლას ლაქსტონი: ქვეყანაში გრძელვადიანად არის შენარჩუნებული მიზნობრივზე დაბალი ინფლაცია და ფასების სტაბილურობა - საქართველო ძალიან მაგარ ფორმაშია
13-12-2024
„ეროვნული ბანკი რისკებზე დაფუძნებული მონეტარული პოლიტიკის მიდგომით ხელმძღვანელობს, რის შედეგადაც ფასების სტაბილურობას წარმატებით უზრუნველყოფს. სწორი მონეტარული პოლიტიკის შედეგად კი ეფექტურად მართავს არსებულ რისკებს“, - განაცხადა მსოფლიოს წამყვანმა ეკონომისტმა და ეროვნული ბანკის საერთაშორისო კონსულტანტმა დუგლას ლაქსტონმა, სებ-ის მიერ ორგანიზებულ საერთაშორისო კონფერენციაზე სახელწოდებით „მონეტარული პოლიტიკის განვითარების შემდგომი ნაბიჯები“.
ლაქსტონმა ხაზი გაუსვა, რომ განვითარებადი ქვეყნების ნებისმიერი ცენტრალური ბანკი, რომელსაც დოლარიზაციის ისტორია აქვს, ინფლაციის მართვისას ყურადღებით უნდა იყოს და განსაკუთრებით იფრთხილოს, რომ ინფლაციური მოლოდინები არ გაიზარდოს.
„ქვეყანაში გრძელვადიანად არის შენარჩუნებული მიზნობრივზე დაბალი ინფლაცია და ფასების სტაბილურობა, საქართველო ძალიან მაგარ ფორმაშია“, - აღნიშნა დუგლას ლაქსტონმა.
როგორც სებ-ში აღნიშნავენ, უკვე ზედიზედ 20 თვეა, საქართველოში მიზნობრივ ინფლაციაზე დაბალი მაჩვენებელი ფიქსირდება.
ეროვნული ბანკის ორგანიზებით ჩატარებული ორდღიანი საერთაშორისო კონფერენციის მიზანი მონეტარული პოლიტიკის ჩარჩოს არსებული გამოწვევებისა და სამომავლო დახვეწის შესახებ დისკუსიების ანალიზი იყო. ღონისძიებაში ქართველი და მსოფლიოს წამყვანი ეკონომისტები მონაწილეობდნენ.
