სამართლიანად ჩატარდა თუ არა არჩევნები
ოკუპირებულ აფხაზეთში 11 წლის მოზარდმა მამის იარაღით 8 წლის ბავშვი მოკლა
13-11-2018
ოკუპირებულ აფხაზეთში 11 წლის მოზარდს 8 წლის ბავშვი შემოაკვდა. შემთხვევა 8 ნოემბერს მოხდა. ორივე მათგანი გუდაუთის რაიონის სოფელ ხუაპის მაცხოვრებლები არიან. როგორც ცნობილია, ტრაგედია იმ დროს მოხდა, როდესაც ისინი სახლში მარტოები იმყოფებოდნენ. 11 წლის მოზარდმა კარადიდან გადატენილი იარაღი გამოიტანა და 8 წლის ბიჭს თავში დამიზნებით ესროლა. იგი ადგილზე გარდაიცვალა.
როგორც მეზობლები ჰყვებიან, შუადღისთვის ჯერ გასროლის ხმა გაიგონეს და შემდეგ - შეშინებული ბავშვის ყვირილი.
"მეექვსე კლასელი ბიჭი იმ დღეს ცუდად იყო და სკოლაში არ წასულა. როგორც ჩანს, მის მეზობლად მცხოვრები მესამე კლასელი ბიჭი სკოლიდან წამოსვლის შემდეგ, მასთან სათამაშოდ მივიდა... მოზარდი სახლში მარტო იყო, მისი მშობლები გასვენებაში იყვნენ. თამაშობდნენ, როდესაც უფროსმა მოზარდმა კარადიდან მამის კუთვნილი იარაღი სათამაშოდ გამოიტანა და პატარა ბიჭს თავში ახლო მანძილიდან დაუმიზნა...
გასროლის შემდეგ ბავშვი გარეთ გავარდნილა, ყვირილით - იარაღი გამივარდაო... თავიდან ეგონათ, რომ მხოლოდ დაჭრილი იყო. თუმცა ადგილზე მისულებს ბავშვი უკვე გარდაცვლილი დახვდათ. ეტყობა ძალიან ახლოდან ესროლა, თავი მთლიანად მოგლეჯილი აქვს... "- იხსენებენ მომხდარ ტრაგედიას სოფლის მაცხოვრებლები.
ფაქტს მწვავე გამოხმაურება მოჰყყვა აფხაზი ინტერნეტმომხმარებლებისგან. ისინი იქ არსებულ ვითარებას 90-იანი წლებს ადარებენ და ამბობენ, რომ მაშინდელივით, იარაღი ახლაც "კარადებში უყრიათ და ბავშვებიც კი არ ერიდებიან მას".
ირაკლი სუხუმსკი - "უპატრონო ქვეყანა, რომელიც ქორწილებითა და გასვენებებით ცხოვრობს და ორივე შემთხვევებში სიკვდილი ჩვეულებრივი გახდა... ქორწილებში სროლები მსხვერპლით სრულდება, გასვენებების ქელეხებში ბათქა-ბუთქია. ბავშვები ეზოში მამების იარაღით თამაშობენ... გილოცავთ, საოცარ ქვეყანას ვაშენებთ..."
ლუიზა ჩამბა - "არავის ანაღვლებს ბაშვების სიცოცხლე და მომავალი, არც უფროსების. ორი ბავშვი უპატრონოდ დატოვეს... არადა, მშობლებმა ორივე ახლობელს ჩააბარა, ყურადღება მიაქციეთო... არაფერს ვამბობ, იმაზე, რომ ვერაფრით გაიგეს, იარაღი კარადაში კი არა, სეიფში უნდა შეინახონ".
იასონ აფხაზი - "იმ რაოდენობის იარაღი აქვს ზოგიერთ აფხაზს ოჯახში, რომ სეიფში კი არა საწყობში უნდა შეინახოს. არაერთხელ შევსწრებივარ და შემთხვევითაც მომისმენია, როგორ ტრაბახობენ მოზარდები მამების იარაღის არსენალით. ავტომატებს ვინ ჩივის, სახლის სარდაფებში ხალხს ყუმბარმტყორცნები, ქვემეხები და სნაიპერული შაშხანები აქვთ. ვინმე დაინტერესდა მათ მიერ მისაკუთრებულ ქართველების სახლებში რას მალავენ და ინახავენ?!. - არა..."
ლუიზა შელია - "გავიგეთ, რომ იარაღი 90-იანი წლების შემდეგ შემოინახა ხალხმა და ჩაბარებაზე კი არ ფიქრობენ, პირიქით, კოლექციას ამდიდრებენ. მე ვიცი ოჯახები, სადაც პროდუქტის კარადაშიც კი იარაღი უყრიათ და ბავშვებს არც კი ერიდებიან. რამდენჯერმე გამოაცხადა შსს-მ ჩააბერეთ იარაღიო, მაგრამ ვინ უსმენს".
