სამართლიანად ჩატარდა თუ არა არჩევნები
„თავდაცვის მოხალისესა“ და „ახალგაზრდობის სააგენტოს“ შორის ურთიერთთანამშრომლობის მემორანდუმი გაფორმდა
20-03-2025
საქართველოს თავდაცვის სამინისტრო სხვადასხვა საგანმანათლებლო და შემეცნებითი პროექტის განხორციელების მიმართულებით განათლების, მეცნიერებისა და ახალგაზრდობის სამინისტროსთან უკვე წლებია აქტიურად თანამშრომლობს.
სამინისტროებს შორის თანამშრომლობის ფარგლებში დღეს, სსიპ „თავდაცვის მოხალისესა“ და სსიპ „ახალგაზრდობის სააგენტოს“ შორის ურთიერთთანამშრომლობის მემორანდუმი გაფორმდა. დოკუმენტს ხელი სსიპ „თავდაცვის მოხალისის“ დირექტორმა, გიორგი სახოკიამ და სსიპ „ახალგაზრდობის სააგენტოს“ ხელმძღვანელის მოვალეობის შემსრულებელმა, ვახტანგ ბააკაშვილმა მოაწერეს.
თავდაცვის სამინისტროს ინფორმაციით, მემორანდუმი ახალგაზრდებში მოხალისეობის მნიშვნელობის შესახებ ცნობიერების ამაღლებას, სოციალური და სამოქალაქო პასუხისმგებლობის ზრდის მხარდაჭერას და მოხალისეობრივ საქმიანობაში მათი აქტიური ჩართულობის უზრუნველყოფას ითვალისწინებს.
იგეგმება ერთობლივი საგანმანათლებლო და საინფორმაციო კამპანიების ორგანიზება, სამხედრო-სასწავლო, სალაშქრო და კულტურულ-შემეცნებითი ღონისძიებების ჩატარება, კონფერენციებისა და სემინარების მოწყობა, ასევე მოხალისეობრივი ინიციატივების განხორციელება.
როგორც თავდაცვის სამინისტროში აღნიშნავენ, „თავდაცვის მოხალისესა“ და „ახალგაზრდობის სააგენტოს“ მჭიდრო თანამშრომლობა ხელს შეუწყობს ახალგაზრდების ჩართულობას საზოგადოებრივ ცხოვრებაში, მოხალისეობის პოპულარიზაციას, სამოქალაქო პასუხისმგებლობის გაძლიერებას და ახალგაზრდებისთვის ახალი შესაძლებლობების გაჩენას.
