გარემოს დაცვისა და სოფლის მეურნეობის მინისტრმა დავით სონღულაშვილმა, აბაშის მუნიციპალიტეტში, სურსათის ეროვნული სააგენტოს ფაროსანასთან ბრძოლის მართვის განახლებული რეგიონული ცენტრი დაათვალიერა და მიმდინარე წელს დაგეგმილი ღონისძიებების შესახებ ინფორმაცია მოისმინა.

შეხვედრაზე იმსჯელეს სახელმწიფო პროგრამით განსაზღვრულ მავნებელთან ბრძოლის მიდგომებსა და სამოქმედო გეგმაზე. აღინიშნა, რომ აზიურ ფაროსანასთან ბრძოლის ღონისძიებებში სახელმწიფო წელსაც აქტიურად იქნება ჩართული. ხაზი გაესვა ადგილობრივი თვითმმართველობის როლს, რომელთა წარმომადგენლები ფაროსანასთან ბრძოლის მართვის ცენტრთან კოორდინაციით მონაწილეობენ ღონისძიებების დაგეგმვის, განხორციელების და მოსახლეობის ინფორმირების პროცესში.

სამუშაო შეხვედრას გარემოს დაცვისა და სოფლის მეურნეობის მინისტრის მოადგილეები კახა კაკაბაძე და ლაშა დოლიძე, აჭარის სოფლის მეურნეობის მინისტრი ზაზა შავაძე, სურსათის ეროვნული სააგენტოს, სოფლის განვითარების სააგენტოს, სოფლის მეურნეობის ლაბორატორიის, „საქართველოს მელიორაციის“, ასევე სამეგრელოს, გურიის, იმერეთის რეგიონების სახელმწიფო რწმუნებულები, ადგილობრივი მუნიციპალიტეტის წარმომადგენლები ესწრებოდნენ.

„ყველა რესურსია მობილიზებული იმისათვის, რომ ფაროსანასთან ბრძოლის ღონისძიებები ეფექტიანად განხორციელდეს. მავნებელთან ბრძოლის არსებული კომპლექსური მიდგომაა, ყველა რგოლის, მათ შორის, ადგილობრივი თვითმმართველობების ჩართულობა, სოფლის რწმუნებულის დონეზე, თითოეულ ფერმერთან აქტიური კომუნიკაცია. ვერ გავყოფთ ზღვარს, რა არის ცენტრალური ხელისუფლების და ადგილობრივი თვითმმართველობის გასაკეთებელი და რა ფერმერის. ფაქტობრივად ეს არის გამოწვევა, რომლის წინააღმდეგაც ყველამ ერთად უნდა ვიბრძოლოთ, რათა მინიმუმამდე შევამციროთ სასოფლო-სამეურნეო კულტურების დაზიანება”,- აღნიშნა დავით სონღულაშვილმა.

აღსანიშნავია, რომ ფაროსანასთან ბრძოლის მართვის ცენტრში მობილიზებულია 250-მდე ერთეული სპეციალიზებული ტექნიკა, შექმნილია მავნებლის გავრცელების მონიტორინგის და მოსახლეობის ინფორმირების სისტემები. განახლდა და კეთილმოეწყო სივრცეები, სადაც შესაძლებელია ფერმერებთან და დაინტერესებულ მხარეებთან საინფორმაციო შეხვედრების ორგანიზება.