დუშეთის მუნიციპალიტეტში, ქარსაფარი ზოლების ტერიტორიებზე ხე-მცენარეების უკანონო ჭრა გამოვლინდა

4-04-2025

მიწათსარგებლობის მონიტორინგის ღონისძიებების ფარგლებში, მიწის მდგრადი მართვისა და მიწათსარგებლობის მონიტორინგის ეროვნული სააგენტოს მიერ, რეგისტრირებული ქარსაფარი ზოლების საზღვრებში ხე-მცენარეების უკანონო ჭრა გამოვლინდა.

წიწვოვანი და ფოთლოვანი ხე-მცენარეების მოჭრის ფაქტი დაფიქსირდა დუშეთის მუნიციპალიტეტის სოფლების: არაგვისპირისა და არანისის ტერიტორიულ არეალში რამდენიმე ლოკაციაზე. გარდა ამისა, გამოვლინდა ქარსაფარი ზოლის გასწვრივ კერძო პირის მიერ ქარსაფარი ზოლის, დაახლოებით 374 კვ.მ-ის ფართობის თვითნებურად შემოკავების და მიწის მოსწორების შემთხვევა. აღნიშნული ტერიტორიის მოსწორებამ მიწის დეგრადაცია გამოიწვია. მონიტორინგის ფარგლებში, ასევე გამოვლინდა იურიდიული პირის მიერ ქარსაფარი ზოლის ტერიტორიაზე 360 კვ.მ-ის ბეტონის საფარის მოწყობის ფაქტი.

აღნიშნული დარღვევების შესახებ ეცნობა გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტს.

დეპარტამენტის მიერ შედგა ადმინისტრაციული სამართალდარღვევის შესახებ ოქმები; გარემოსთვის მიყენებულმა ზიანმა, პირველ შემთხვევაში 1,106.01 ლარი, ხოლო მეორე შემთხვევაში - 2,129.22 ლარი შეადგინა.

მიწათსარგებლობის მონიტორინგის ღონისძიებები მომავალშიც გაგრძელდება.

აღსანიშნავია, რომ ქარსაფარი ზოლების საინვენტარიზაციო სამუშაოები დუშეთის მუნიციპალიტეტში 2023 წელს ჩატარდა. ინვენტარიზებულმა ფართობმა შეადგინა 155.2 ჰექტარი ქარსაფარი ზოლი, საიდანაც 154.48 ჰექტარი საჯარო რეესტრის ეროვნულ სააგენტოში სახელმწიფო საკუთრებაში არსებული ქარსაფრის სტატუსითაა რეგისტრირებული.