ზურაბ ქადაგიძე: ამ მომენტისთვის იკვეთება ერთი რამ - არავითარი ნიშან-წყალი „დიპ სტეიტის“ დამარცხების არ ჩანს, უფრო მეტიც, აშკარა ხდება, რომ დონალდ ტრამპი მათ ხელში ისეთივე იარაღია, როგორც ბაიდენი

4-04-2025

ძალიან მნიშვნელოვანია, რომ ქართული საზოგადოება აღჭურვილი იყოს სიმართლით, რაც მისცემს საშუალებას, სწორი შეფასებები გააკეთოს საქართველოსთან მიმართებით უცხო ქვეყნების მხრიდან წამოსულ აგრესიულ შეტევებზე. ამ მომენტისთვის იკვეთება ერთი რამ - არავითარი ნიშანწყალი „დიპ სტეიტის“ დამარცხების არ ჩანს, - წერს „ხალხის ძალის“ წევრი ზურაბ ქადაგიძე სოციალურ ქსელში.

მისივე თქმით, საზოგადოებამ უნდა იცოდეს, რომ ტრამპი „დიპ სტეიტის“ ხელში იარაღია, რომელიც ბაიდენისგან მხოლოდ იმით განსხვავდება, რომ განსხვავებული რიტორიკა აქვს სხვადასხვა თემის მიმართ და აქედან გამომდინარე - არანაირი განსაკუთრებული მოლოდინი, რომ ტრამპი და მისი გუნდი საქართველოს მადლობას გადაუხდის მისი სწორი პოზიციის გამო და მეგობრობა სუფთა ფურცლიდან დაიწყებს - არ უნდა გვქონდეს.

„გუშინ ფილოსოფოსმა ზაზა შათირიშვილმა საზოგადოებას შესთავაზა ანალიზი, თუ რა პროცესები მიდის დღეს ამერიკის შეერთებულ შტატებში.

განსაკუთრებით ყურადსაღები იყო შეფასებები „დიპ სტეიტის“ რებრენდინგის და მოდერნიზაციის თაობაზე. ძალიან მნიშვნელოვანია, რომ ქართული საზოგადოება აღჭურვილი იყოს სიმართლით, რაც მისცემს საშუალებას, სწორი შეფასებები გააკეთოს საქართველოსთან მიმართებით უცხო ქვეყნების მხრიდან წამოსულ აგრესიულ შეტევებზე. ამ მომენტისთვის იკვეთება ერთი რამ - არავითარი ნიშანწყალი „დიპ სტეიტის“ დამარცხების არ ჩანს. უფრო მეტიც, აშკარა ხდება, რომ დონალდ ტრამპი მათ ხელში ისეთივე იარაღია, როგორც ბაიდენი, უბრალოდ სახეცვლილი მიდგომებით და აქცენტებით. სამწუხაროდ, უნდა პირდაპირ ვთქვათ, რომ ფაქტების ანალიზი სხვა შეფასებების გაკეთების საშუალებას არ გვაძლევს. ახალ ადმინისტრაციას აქამდე ჰქონდა საკმარისი დრო და შესაძლებლობა, რომ ქმედითი ნაბიჯები გადაედგათ საქართველოსთან მიმართებით. როგორც მინიმუმ, მადლობა მაინც ეთქვათ იმისათვის, რომ „დიპ სტეიტზე“ საუბარი და ამ გლობალური ძალის კრიტიკა ჯერ კიდევ მაშინ დაიწყო საქართველოს ხელისუფლებამ, როდესაც ხმის ამოღებას ვერავინ ბედავდა. 3 წლის თავზე კი ტრამპიც და მთელი მისი გუნდი სწორედ „ქართული ოცნების“ მესიჯბოქსზე დაჯდა. დღეს აშშ-ს გაცხოველებული სავაჭრო პარტნიორობა აქვს რუსეთთან, ხოლო არარსებული „რუსული კავშირების“ გამო დასანქცირებული ბიძინა ივანიშვილი კვლავ სანქციების ქვეშ რჩება. ახალმა ადმინისტრაციამ მწვავედ გააკრიტიკა რუმინეთში არჩევნების შედეგების გაუქმება, მაგრამ არანაირი ქმედითი ნაბიჯი ამ უსამართლობის აღმოსაფხვრელად მათ არ გაუკეთებიათ. უფრო მეტიც, გამარჯვებული ჯორჯესკუ მრავალწლიანი პატიმრობის მოლოდინშია. სიტყვით ახალი ადმინისტრაცია მეგობრობს უნგრეთთან და კონკრეტულად პრემიერ ორბანთან, მაგრამ მისი მარჯვენა ხელი კვლავ სანქცირებული რჩება და აშშ-ის ახალ ადმინისტრაციას აზრადაც არ მოსვლია ამ სანქციების გაუქმება. სწორედ ამიტომ, საზოგადოებამ უნდა იცოდეს, რომ ტრამპი „დიპ სტეიტის“ ხელში იარაღია, რომელიც ბაიდენისგან მხოლოდ იმით განსხვავდება, რომ განსხვავებული რიტორიკა აქვს სხვადასხვა თემის მიმართ. აქედან გამომდინარე - არანაირი განსაკუთრებული მოლოდინი, რომ ტრამპი და მისი გუნდი საქართველოს მადლობას გადაუხდის მისი სწორი პოზიციის გამო და მეგობრობა სუფთა ფურცლიდან დაიწყებს - არ უნდა გვქონდეს“, - წერს ზურაბ ქადაგიძე.