სამართლიანად ჩატარდა თუ არა არჩევნები
ბათუმში მშენებლობებთან დაკავშირებით ზედამხედველობა გამკაცრდება
10-12-2018
ბათუმში მშენებლობებთან დაკავშირებით ზედამხედველობა კიდევ უფრო გამკაცრდება, მაგრამ ბიზნესს ექნება მაქსიმალური მხარდაჭერა, არავის მივცემთ უფლებას, სასიცოცხლოდ მნიშვნელოვანი პროექტები შეჩერდეს, – ეს განცხადება აჭარის მთავრობის თავმჯდომარემ, თორნიკე რიჟვაძემ გააკეთა. ამის შესახებ 1tv.ge წერს.
"პირადად ვარ ნებისმიერი ქაოტური მშენებლობის წინააღმდეგი. მოსვლისთანავე პირველი რაც გავაკეთე, ახალ ბულვარში ბენზინგასამართი სადგურის დემონტაჟი იყო. ეს არის კონკრეტული საქმე, რაც ასახავს ჩემი და ჩვენი გუნდის პოზიციას. რაც შეეხება ჩემს კომენტარს, კონკრეტულ ჯგუფთან დაკავშირებით, ეს არის მართლაც ძალიან ვიწრო ჯგუფი, რომელიც ახდენს საზოგადოებაში გარკვეული ინტერპრეტაციების შეტანას. ვერავის მივცემთ უფლებას, დასაქმებულ მოსახლეობას შეუჩეროს შემოსავლის წყარო, არავის მივცემ უფლებას, სასიცოცხლოდ მნიშვნელოვანი პროექტები გაჩერდეს“,- განაცხადა თორნიკე რიჟვაძემ.
სამშენებლო ბიზნესის მხარდაჭერასთან დაკავშირებით, რიჟვაძემ განცხადება პირველად რამდენიმე დღის წინ გააკეთა და განაცხადა, რომ გარკვეულ ჯგუფს აქვს უსუსური მცდელობა გავლენა მოახდინოს და დააკომპლექსოს გადაწყვეტილების მიმღები ჩინოვნიკები.
მას არ დაუკონკრეტებია, ვის გულისხმობდა ამ ჯგუფებში.
