რუსთავიდან თბილისში, დიდუბის მიმართულებით მგზავრთა გადაყვანა პარალიზებულია

29-03-2019

რუსთავიდან თბილისში, დიდუბის მიმართულებით მგზავრთა გადაყვანა პარალიზებულია. მარშრუტზე კომპანია "ინტერტრანსის" კუთვნილი ყვითელი მიკროავტობუსები დილიდან აღარ მოძრაობენ.

„ინტერტრანსში" აღნიშნულ მარშრუტზე დასაქმებული მძღოლების განცხადებით, კომპანიამ, მათ ყოველდღიურად შესატანი თანხა 10 ლარით, 70 ლარამდე გაუზარდა. მძღოლებისგან უარის მიღების შემდეგ კი მათ ავტოსადგომიდან ხაზზე გასასვლელად მიკროავტობუსები აღარ მისცეს.

კომპანია "ინტერტრანსში" აცხადებენ, რომ ყოველდღიურად მძღოლების მიერ შესატანი თანხა, გაზაფხულზე მგზავრთა ნაკადის გაზრდასთან ერთად იზრდება და შარშან, მარტში რა გადასახადიც იყო, ახლაც იგივეა. ამის თაობაზე კი მძღოლები ჯერ კიდევ ერთი თვის წინ იყვნენ ინფორმირებულები.

„მძღოლები ინფორმირებული იყვნენ, მათ ჯერ კიდევ მარტის თვეში იცოდნენ, რომ ყოველდღიური ნორმირებული გადასახადი ძველ ნიშნულს უბრუნდებოდა. შეიძლება ითქვას, რომ ისინი ულტიმატუმის ენაზე გვესაუბრებიან და აცხადებენ, რომ თუ არ გაიზრდება მგზავრობის საფასური, არ გადაიხდიან დღიურ ნორმირებულ გადასახადს. კომპანია დათმობაზე წასვლას არ აპირებს", - განაცხადა კომპანია "ინტერტრანსის" წარმომადგენელმა სოფო ცერცვაძემ.

ინტერპრესნიუსი